Źniavolenamueks-kandydatu ŭ prezidenty Dźmitryju Usu doŭhaterminovaje spatkańnie z žonkaj Jaŭhienijaj skaročana da adnaho dnia.
Jaŭhienija Us paviedamiła BiełaPAN, što źbirałasia pajechać u papraŭčuju kałoniju ŭ Mahilovie, dzie ŭtrymoŭvajecca jaje muž, 5 vieraśnia. «Raniej płanavałasia, što spatkańnie budzie z 5 pa 7 vieraśnia. Adnak učora Dźmitryj patelefanavaŭ z turmy i paviedamiŭ, što spatkańnie skaročana da adnaho dnia.
Jon skazaŭ, što jamu prapanavali napisać list ab pamiłavańni na imia Alaksandra Łukašenki, ale jon heta zrabić admoviŭsia. U vyniku načalnik kałonii pazbaviŭ jaho doŭhaterminovaha spatkańnia i zamianiŭ jaho adnadzionnym 8 vieraśnia»,— skazała žonka Usa.
Taksama jana paviedamiła, što na pazaminułym tydni vysłała mužu banderol ź nieabchodnymi miedpreparatami. «Dźmitryj paćvierdziŭ, što takaja banderol u kałonii atrymana, adnak lekaŭ ź jaje jamu nie vydajuć, niahledziačy na toje, što ŭsie leki byli vypisanyja turemnym uračom», — adznačyła Jaŭhienija.
Jana rasceńvaje heta jak nacisk na byłoha kandydata ŭ prezidenty, kab jon usio ž napisaŭ prašeńnie ab pamiłavańni.
Tym nie mienš, adznačyła Jaŭhienija, Dźmitryj Us pačuvaje siabie lahčej, pakolki «ŭžo adaptavaŭsia da ŭmoŭ u kałonii».
Dźmitryj Us byŭ pryznany vinavatym u arhanizacyi masavych biesparadkaŭ u Minsku 19 śniežnia 2010 hoda. 26 maja sud Leninskaha rajona stalicy pryhavaryŭ jaho da piaci z pałovaj hadoŭ pazbaŭleńnia voli ŭ kałonii ŭzmocnienaha režymu. 19 lipienia Minski haradski sud pakinuŭ pryhavor rajsuda bieź źmianieńniaŭ.