U aŭtobusnym parku Baranavičaŭ pracujuć i staryja i novyja aŭtobusy. Fota Intex-press.by
Vakoł administracyi parka i sapraŭdy naviali pryhažość. Fota Barautopark.by
«Kiroŭcy na inšych pradpryjemstvach atrymlivajuć nie mienš za nas, ale my nie drovy vozim, a ludziej — adkaznaść bolšaja», — napisaŭ u «NN» kiroŭca baranavickaha aŭtobusnaha parka. Jon piša, što zarobki ŭ kiroŭcaŭ składajuć kala 2 miljonaŭ, ich nie padvyšali ad apošniaj devalvacyi. Jašče adna prablema — adsutnaść zapčastak i ramontnych kamplektaŭ. «Kiraŭnictva parka i zajmajecca tym, što paradkuje terytoryju. Ale dakładna jak u krainie: tolki kab zvonku ŭsio pryhoža, a što ŭ siaredzinie bardak — nikoha nie cikavić».
Aŭtar lista padkreśliŭ, što kiroŭcy nie mohuć strajkavać. «Prablem šmat, ale ci buduć jany vyrašanyja?» — zadajecca pytańniem kiroŭca.
Tema zarobkaŭ aŭtobusnaha parka fihuravała sioleta ŭ miascovaj presie. Hazieta «Intex-press» pisała ŭ lipieni sa spasyłkaj na administracyju parka, što siaredni zarobak kiroŭcaŭ składaje kala 2,2 młn rubloŭ. Na sajcie vydańnia pad tym artykułam razharełasia dyskusija. Mnohija čytačy pisali, što pamier zarobku, ukazany ŭ tekście, zavyšany. «Pra jakija 2,2 młn. razmova? Ja pracuju tam praktyčna biez vychodnych i maksimum, što mnie naličvajuć — 1,5 młn», — napisaŭ adzin z čytačoŭ. Inšyja zhadvali prablemu sastarełaha parka aŭtobusaŭ.
U administracyi parka karespandentu «NN» paviedamili, što ahučanyja ŭ liście prablemy nie majuć pad saboj hruntu. Tam raskazali, što siaredni zarobak kiroŭcaŭ aŭtobusaŭ u kastryčniku skłaŭ kala 2,7 miljonaŭ. Niama i prablem z ramontnymi kamplektami i zapčastkami. «Kali chtości z kiroŭcaŭ u časie rejsa sutykajecca z surjoznaj pałomkaj, my vysyłajem jamu inšy aŭtobus, tamu nichto nie hublaje ŭ zarobkach na prastojach», — zapeŭnili ŭ aŭtaparku.
