«Kaalicyja šaści» ŭzhadniła pazicyi adnosna ŭdziełu ŭ parłamienckaj vybarčaj kampanii 2012 hoda, paviedamiŭ namieśnik staršyni Abjadnanaj hramadzianskaj partyi (AHP) Leŭ Marholin.
Kansultacyi prajšli ŭ Minsku 23 studzienia. U ich uziali ŭdzieł pradstaŭniki AHP, Partyi BNF, Biełaruskaj partyi levych «Spraviadlivy śviet», arhkamiteta pa stvareńni partyi «Biełaruskaja chryścijanskaja demakratyja», ruchu «Za Svabodu» i hramadzianskaj kampanii «Havary praŭdu!».
Pavodle słoŭ Marholina, «kaalicyja šaści» ličyć, što «vybaraŭ u Biełarusi niama, i niama nijakich namiokaŭ, što jany mohuć być praviedzieny ŭ adpaviednaści ź jeŭrapiejskimi standartami».
Abaviazkovaj umovaj praviadzieńnia demakratyčnych vybaraŭ, a taksama lehalizacyi ŭłady pazicyjnyja struktury ličać vyzvaleńnie palitźniavolenych.
«Kaalicyja šaści» razhladaje parłamienckija vybary ŭ jakaści «šyrokaj palityčnaj kampanii», adznačyŭ Marholin. «My pavinny prykłaści namahańni, kab vykarystać jaje pa maksimumie. Pryčym kampanija pavinna ŭklučać nie tolki parłamienckija vybary sami pa sabie, ale i dziejańni pa kansalidacyi nasielnictva vakoł prychilnikaŭ pieramien, prapahandzie siarod vybarščykaŭ palityčnaj alternatyvy ciapierašniamu režymu», — padkreśliŭ palityk.
Kab vyznačyć, jakija kankretna dziejańni treba realizavać padčas kampanii,
«kaalicyja šaści» maje namier pravieści šyrokuju hramadskuju dyskusiju z pryciahnieńniem ekśpiertaŭ.Pavodle słoŭ Marholina, dyskusija nie budzie zaciahvacca: na kankretnyja rašeńni płanujecca vyjści na praciahu maksimum dvuch miesiacaŭ. Pry nieabchodnaści nie vyklučana praviadzieńnie kanhresu demakratyčnych sił, jaki zaćvierdzić adzinuju pazicyju.
Marholin padkreśliŭ: dla «kaalicyi šaści» «nie isnuje pytańnia, udzielničać u vybarach ci nie». «Bajkot — heta adna z form udziełu, jakaja praduhledžvaje vyłučeńnie pradstaŭnikoŭ u vybarčyja kamisii, praviadzieńnie nazirańnia za vybarami, a taksama, mahčyma, i vyłučeńnie kandydataŭ u deputaty», — patłumačyŭ palityk.
Namieśnik staršyni AHP ličyć, što da parłamienckich vybaraŭ zastajecca dastatkova času, kab «dakładna sfarmulavać usie padychody, pradjavić uładam umovy ŭdziełu apazicyi ŭ vybarach, a taksama dać im čas adreahavać na hetyja ŭmovy».
Najbližejšym časam prajekt dakumienta, tekst jakoha byŭ uzhodnieny siońnia, padpišuć lidary arhanizacyj, što ŭvachodziać u «kaalicyju šaści».
