Z hetaha śvietu. Vieršy paśla vieršaŭ / Leanid Hałubovič. — Minsk: Knihazbor, 2012. — 108 s.
Paśla taho, jak u 2000-m vyjšli «apošnija vieršy leanida hałuboviča», jon z paezijaj «zaviazaŭ». Nie ŭsie, praŭda, pavieryli. Ale minali hod za hodam, a novych radkoŭ Hałuboviča tak i nie było. I navat skieptyki zdalisia.
Hałubovič skiravaŭ svaju enierhiju ŭ inšy bok — u krytyku. Tydniovik «Litaratura i mastactva» drukavaŭ «Kułuary», u jakich jon LeHalizavaŭ knihi biełaruskich aŭtaraŭ. Pakul tuju rubryku nie zakryli.
Zatym i kniha vyjšła jaho krytyčnych ese -- «Sys i Kułuary».
Paet nieadnarazova padkreślivaŭ, što pić kinuŭ i vieršy pisać kinuŭ. Ale kali pieršaha zaroku trymajecca šmat hadoŭ , to ad paezii adračysia ŭsio-taki nie zdoleŭ.
«Z hetaha śvietu» — 23 kniha ŭ sieryi «Kniharnia piśmieńnika».
Leanid Hałubovič
Usie maje lepšyja vieršy
sa mnoju pavinny pamierci,
kali ž ja skanaju pieršy,
to vy im paviercie
i biez majoj prysutnaści,
prosta na słova,
bo, kali brać pa sutnaści,
ja — ich pałova.
Nie taja, što vodzić piarom
i strofy składaje,
a taja, što ŭ nieba prałom
pahlady kidaje
i łović małanki klinok
natomlenym ducham,
ziamny zaviaršyŭšy vitok
niemačnaj skruchaj.
Kali ž pakaraje Haspodź —
i žyć budu doŭha,
čytač, nie saromsia, prychodź
za paetyčnym doŭham.
Ci choć by zirnuć na taho,
chto zorki vymolvaŭ ź nieba
nie tolki dla adnaho
duchoŭnaha chleba,
chto ŭ cień stupaŭ Satany,
dušy svajoj nie pradaŭšy,
taho, što Boh zataiŭ,
tak i nie razhadaŭšy…
29 krasavika 2011
* * *
Leanid Hałubovič naradziŭsia ŭ vioscy Varonina ŭ Kleckim rajonie. Skončyŭ PTV u Słucku. Praciahły čas pracavaŭ elektrykam. U 1984 Hałubovič vydaŭ zbornik vieršaŭ «Tajemnaść ahniu», za jaki jaho pryniali ŭ Sajuz piśmieńnikaŭ. Skončyŭ Vyšejšyja litaraturnyja kursy ŭ Maskvie. Pracavaŭ na Biełaruskim telebačańni, u časopisie «Krynica». Napisaŭ knihi «Spoviedź biassonnaj dušy» (1989), «Busieł biez hniazda» (1989), «Tajemnaść spoviedzi» (1993), «Załožnik ciemry» (1994), «Zaciemki ź levaj kišeni» (1998).
