Za časami HDR terminam «Kirche von unten» (skaročana «KVU», u pierakładzie — carkva, jakaja idzie ad «nizoŭ») nazyvali niefarmalny sajuz carkvy i valnadumnaj intelihiencyi. Dysydenty mahli adnosna svabodna abmieńvacca dumkami ŭ pamiaškańniach, jakija naležali carkvie, bo jana taksama była niezdavolenaja režymam. Ciapier u Niamieččynie demakratyja, u adroźnieńnie ad nie takoj užo j dalokaj Biełarusi, čyje mastaki niaredka majuć bolš šancaŭ pakazać svaje pracy na Zachadzie, čym na radzimie. Tamu biełaruskaja anderhraŭnd-kultura pacichu-patrochu, ale prabivaje šlach u ahulnaeŭrapiejskuju prastoru svabodnaha mastactva. Tak, 25 listapada ŭ berlinskim klubie «KVU» ŭ rajonie Prencłaŭer-Berh adčyniłasia supolnaja vystava šaści biełaruskich i niamieckich fotamastakoŭ i fotakarespandentaŭ «Berlin—Miensk. Alternatyŭnyja pohlady».
«KVU» — klub moładzievy i niefarmalny, tamu zaprošanyja fatohrafy całkam adpaviadajuć jaho imidžu. Dvoje — Kaj Anakier-Santarovič i Folkier Barnt — naradzilisia ŭ Niamieččynie, troje — Maksim Šumilin, Michaił Leščanka i Ksienia Murač — žyvuć u Biełarusi, jašče dvoje — Andrej Łohinaŭ i Źmicier Lalčuk — znachodziacca ŭ tvorčym pošuku pamiž dźviuma krainami. Arhanizavała vystavu hrupa adnadumcaŭ, jakich łučać supolnyja intaresy i daŭniaje siabroŭstva, zaviazanaje ŭ roznych punktach na linii Miensk—Berlin. Pravieści vystavu dapamoh niamiecki fond Roberta Boša.
Vystava ŭ Berlinie — heta pohlad maładych mastakoŭ i žurnalistaŭ na Biełaruś praz vočka fotaabjektyva. Na adkryćci vystavy 25 listapada byŭ sapraŭdny anšlah — kala 300 naviedvalnikaŭ. 28 listapada, padčas zaklučnaj dyskusii, arhanizatary nalivali boršč dy nakładali ŭ talerki draniki z hrybami dy miasam. Imprezy takoha kštałtu — dadatkovaja nahoda pierakanacca, što koła ludziej, jakija žyvuć u Niamieččynie ale ščyra cikaviacca Biełaruśsiu, dosyć šyrokaje.
Prajekt budzie mieć praciah u Miensku. Tyja samyja fatohrafy prezentujuć staličnaj publicy svoj pohlad na Niamieččynu. Adkryćcio vystavy — 23 śniežnia a 18-j hadzinie ŭ niezaležnaj mienskaj art-halerei «Padziemka» (praspekt Skaryny, 43). Jak kaža Hanna Anakier-Santarovič, adna z arhanizatarak vystavy, «Padziemka» — adzinaje miesca ŭ Miensku, dzie možna vystaŭlać anderhraŭndnaje mastactva biez prablem ź biurakratyjaj.
