ADAMOVIČA ZNOŬ SUDZIAĆ
U piatnicu, 23-ha kastryčnika, paet i žurnalist Słavamir Adamovič byŭ hatovy sieści za kraty na 15 sutak. Pierad tym, jak zajści ŭ kabinet sudździ Savieckaha rajonnaha suda hramadzianki Savaścian, aŭtar vierša «Ubiej priezidienta» kupiŭ bochan «Naračanskaha», zatelefanavaŭ siabram, vypiŭ 50 hramaŭ biełaruskaj harełki «Kryštal» i źjeŭ dva buterbrody z servełatam. Adnak hetym razam abyšłosia. Sudździa Savaścian abmiežavałasia karotkaj razmovaj i abiacańniem, što kropka ŭ spravie budzie pastaŭlenaja praz dva tydni.
Z 14-ha kastryčnika pajšoŭ druhi hod, jak sudovy vykanaŭca Kačan (pa sumiaščalnictvie — student jurydyčnaha fakultetu BDU) sprabuje spahnać z paeta 554 tysiačy biełaruskich rubloŭ na karyść sudova-medycynskich ekspertaŭ, jakija 17 traŭnia 1996 hodu praviarali Adamoviča na pradmiet psychičnaj ustojlivaści (inicyjataram ekspertyzy byŭ śledčy KHB Sakolčyk). Nahadajem, što pavodle prysudu Viciebskaha abłasnoha suda (sudździa Hurko) Adamovič musiŭ zapłacić jašče j za pracu pierakładčykaŭ, jakija pa patrabavańni padsudnaha pierakładali pramovy ŭdzielnikaŭ sudovaha raźbiralnictva z rasiejskaj movy na biełaruskuju. Viarchoŭny Sud skasavaŭ hetuju vymohu abłsuda, ale pakinuŭ u sile inšuju, nia mienš absurdnuju.
Słavamir Adamovič nie źbiraŭsia i nie źbirajecca samachoć spłačvać nivodnaha rubla ŭładzie, jakuju ličyć nielehitymnaj i antybiełaruskaj. Tamu ŭłada vypisała jamu jašče adnu sudovuju pozvu, u jakoj były siadzielec «amerykanki» nazvany parušalnikam artykuła 166.1 Kodeksa Respubliki Biełaruś ab administratyŭnych pravaparušeńniach i papiaredžany pra nieabchodnaść 6.11.98 hodu ŭ 11 h. 30 chv. źjavicca na adras: Miensk, Varvašeni, d. 44.
Naziralniku ad Biełaruskaha Chielsynskaha kamitetu i karespandentu hazety «Naviny», jakija prysutničali pry razmovie sudździ i paeta, apošni paviedamiŭ, što 6 listapada 1998 hodu jon abaviazkova źjavicca na ŭkazany adras, kab u spravie №182-166.1 pastavić kropku.
P.S. Maładaja sakratarka suda była pryjemna ździŭlenaja, pačuŭšy imia paeta. Słavamiraŭna — jejnaje proźvišča pa baćku.
Jedmuś Kotka
