Trapnaje słova «Dremaki»
Doŭha šukaŭ nahody, kab vykarystać hetaje fajnaje dyjalektnaje słova, jakoje adnojčy pačuŭ ad palešuka z Davyd-Haradku. Tak jon u havorcy nazvaŭ svaich ziemlakoŭ, jakim uvieś čas sprabuje davieści, što ciapierašniaja ŭłada ich paprostu duryć, a ziemlaki jak ziemlaki — usio dahladajuć bydła, ščyrujuć na poli dy maŭčać.
Potym padumaŭ — a što tut šukać, nahodaŭ u maim horadzie, na majoj ziamli — što ŭ durnia machorki.
Abłasnyja ŭłady ciapier pastanavili, kab kałhasnaje kiraŭnictva štodnia kantralavała kolkaść siena, jakoje kałhaśniki ŭ volny ad pracy ŭ kałhasie čas narychtoŭvajuć dziela patrebaŭ ułasnaj haspadarki. Zdavałasia b, našto ŭładam spatrebiłasia ličyć pryvatnaje siena biednaha kałhaśnika? «Jedzie, jedzie prodraźviorstka, užo vioska blizka....» Nichto ŭ vioskach navat nie źviarnuŭ na heta ŭvahi — vielmi ŭžo pryzvyčailisia da ŭsialakich kantrolaŭ. Dremaki? Nu dyk heta ž kałhaśniki, skažacie, tolki BT i hladziać, a voś by, da prykładu, biznesmenaŭ uziać. Kali łaska.
Ad pačatku lipienia dla pradprymalnikaŭ apłata za miesca na centralnym kirmašy, dzie jany štodnia staviać svaje namioty, padvysiłasia adrazu ŭdvaja — ciapier niešta kala 20 tysiačaŭ štomiesiac. Koštam biznesmenaŭ, jakija j tak dajuć dziaržavie niamała hrošaj, vyrašyli jašče rekanstrukcyju kirmašu zrabić. Siaredniaja klasa aburajecca? Nie. Dremaki? Nu, iznoŭ skažacie, dyk niašmat siarod ich hramatnych, kali b intelihiencyju ŭziać...
Sustreŭ adnaklaśnicu, jakaja ciapier nastaŭničaje ŭ adnoj z haradzkich škołaŭ. Kaža: zarobak navat na dźvie staŭki mizerny dy jašče i vypłočvajuć niesvaječasova. Pytajusia: a biaspłatna siena kasić na kałhasnyja paletki z kalehami ŭsio adno jeździcie (kožny nastaŭnik musić narychtavać siena 200 kilaŭ)? Adkazvaje: nie, što ty, ja adkupiłasia — 5 tysiačaŭ zapłaciła (ledź nie tracina zarobku), kab adčapilisia! Ad čaho adkupiłasia i ŭ kaho? Chiba ad svaich niepasrednych abaviazkaŭ u dziaržavy, jakaja prosta ździekujecca ź jaje? Dumajecie, šmat chto ź «pieradavoj intelihiencyi» — nastaŭnikaŭ — aburyŭsia? Nie — kosiać albo płaciać. Dremaki? Dremaki.
Alaksiej Dzikavicki, Pinsk
