U aŭtorak pa spravie ab vykradańni staraśvieckich knižak z Nacyjanalnaj biblijateki byli aryštavanyja čatyry čałavieki. Siarod ich — student IV kursu adździaleńnia mižnarodnaha prava fakultetu mižnarodnych adnosinaŭ BDU, były čempijon krainy pa taekvando K. ź Bieraścia i jahonaja žonka — niepasrednyja vykradalniki. Student znachodziŭsia ŭ akademičnym adpačynku, ź jakoha musiŭ viarnucca ŭ sakaviku, ale ŭ hetym semestry tolki paru razoŭ naviedaŭsia va ŭniversytet. Što jaho prymusiła pajści na złačynstva? Mahčyma, banalnaja nieabchodnaść znajści hrošy na navučańnie.
Adździaleńnie, dzie vučyŭsia aryštavany, — prestyžnaje i niatannaje. Hod navučańnia dla płatnikaŭ, pryniatych biez ekzamenaŭ, kaštuje 3000 u.a. Kali pry pastupleńni abituryjent trochi nie dabraŭ bałaŭ, jon moža vučycca, zapłaciŭšy prykładna 50% hetaj sumy za pieršy hod, tracinu jaje — za druhi i šostuju častku — za treci kurs. Pry vydatnaj paśpiachovaści pačynajučy z 4-ha kursu płata skasoŭvajecca. Mienavita hetaha dasiahnuŭ K. Jon byŭ kruhłym vydatnikam, «najlepšym kamandziram» uzvodu na vajskovaj katedry, niadaŭna ažaniŭsia. A ŭ akademičny adpačynak pajšoŭ zusim nie dziela prablemaŭ z vučobaj. Jahonyja znajomyja, adnak, nie vyklučajuć, što na im visieli zapazyčanaści, u jakija jon ulez u pieršyja hady navučańnia.
Vypuskniki mižnarodnaha prava, aproč dyplomu, atrymlivajuć na ŭsio žyćcio svojeasablivy mentalitet. Heta — nie viasiołyja «palityčnyja mastaki» z adździaleńnia mižnarodnych adnosinaŭ. «Prava» prymušaje maładziona sutyknucca ź jurydyčnym moram «adčužanych formaŭ» sučasnaha śvietu. Jak vykazaŭsia adzin student-praŭnik, «juryst — heta žrec pustaty, heta sutnaść jahonaj prafesii, i hora tamu, chto zrazumieje hetuju sutnaść!» K. dobra razumieŭ sutnaść rečaŭ, bo zaŭždy šukaŭ bolšaha.
Adnakurśniki K. sumniajucca ŭ vinavataści svajho tavaryša. K. cikaviŭsia i aktyŭna zajmaŭsia navukaj, jašče na pieršym kursie zachapiŭsia historyjaj dziaržavy i prava Biełarusi. Jon vyvučaŭ jaje pad kiraŭnictvam słynnaha prafesara Jucha, a ŭrešcie navat pačaŭ sam pisać knihu. Mienavita tamu ci nie štodnia naviedvaŭ adździeł redkaj knihi. «Mo pamyłka», — spadziajucca na fakultecie. Tym nia mienš, jak nam paviedamili, «K. ad niadaŭna bolš nie źjaŭlajecca studentam BDU». Sud vyśvietlić iścinu, va ŭniversytecie aktyŭna pracujuć śledčyja KDB.
K. i jahonym chaŭruśnikam pahražaje da 15 hadoŭ źniavoleńnia, kali vina budzie dakazanaja. Pad padazreńniem akazaŭsia i žychar Maskvy, u jakoha znajšli calutkimi ŭsie 12 vydańniaŭ, u tym liku inkunabułu. Mo jon i byŭ zamoŭnikam.
Knihi ŭ Miensk pryvioz asabista pradstaŭnik MUS Biełarusi ŭ Rasiei Faryd Kancaraŭ. Taciana Roščyna, kiraŭnica adździełu redkaj knihi, svaje vydańni ŭbačyć praz tydzień. Pakul śviedki stahodździaŭ «biaruć udzieł» u śledčych mierapryjemstvach. Zastajecca nazvać śledčych, jakija mienš čym za miesiac viarnuli nacyjanalnyja kaštoŭnaści ŭ krainu. Heta hrupa pad kiraŭnictvam namieśnika načalnika ŭpraŭleńnia śledčaha kamitetu MUS Viktara Łabynki.
SR
