У Мінскім гарадскім судзе доўжацца спрэчкі па «справе сямнаццаці», галоўным фігурантам якой з'яўляецца 31-гадовы мінчанін Канстанцін Вілюга. Менавіта ён, паводле версіі следства, арганізаваў міжнародную злачынную групу па продажы наркотыкаў у Беларусі і Расіі. Анлайн-крама называлася LegalMinsk. Пракурор Алег Буйлянкоў зачытаў, што было знойдзенае пры ператрусе кватэры Вілюгі, паведамляе БелаПАН.
Канстанцін Вілюга быў затрыманы 4 лістапада 2014 года. З таго часу знаходзіцца пад вартай. Пры затрыманні пагражаў падключыць уплывовых знаёмых. «У яго і мільёны долараў былі, і сувязі, — адзначаў у інтэрв'ю БелаПАН начальнік ГУБАЗіК МУС Мікалай Карпянкоў. — Мы не можам сказаць, як ён уздзейнічаў, але гэта быў такі вялікі націск, што сітуацыя дайшла да кіраўніка дзяржавы».
У дзень затрымання прайшоў ператрус у кватэры галоўнага фігуранта. Як адзначыў дзяржабвінаваўца, аператыўнікі выявілі дзясяткі сім-карт і пластыкавых картак, а таксама чамадан, у якім ляжалі грошы — 125 тыс. расійскіх рублёў і 58 тыс. долараў.
Акрамя таго, у кватэры была машынка для падліку банкнот, тры радыёстанцыі, дыскі, на якіх захаваліся запісы скайп-канферэнцый з іншымі ўдзельнікамі наркатычнага рынку Беларусі, у прыватнасці прадстаўнікамі крамы «Космас». Іх называюць асноўнымі канкурэнтамі Вілюгі. Размовы, як адзначыў пракурор Буйлянкоў, тычыліся падзелу рынку па продажы спайсаў, а таксама аптовых і рознічных цэн на курыльныя сумесі і псіхатропы.
У кватэры Вілюгі была выяўленая копія адміністрацыйнай справы ў дачыненні да Аліны Церагеры, якая таксама праходзіць абвінавачанай па «справе сямнаццаці». Згодна з версіяй следства, яна ўзначальвала «бізнес» Вілюгі ў Мінску.
У судзе прагучала, што Церагеру неаднаразова затрымлівалі за продаж спайсаў, але адпускалі на свабоду, бо выяўленыя ў яе сумесі былі на той момант легальнымі.
Летам 2014 года ў яе ў кватэры была знойдзеная буйная партыя забароненых рэчываў. З таго часу дзяўчына знаходзіцца пад вартай.
Вілюга, як і большасць падсудных, сваю віну не прызнае. Яны яшчэ выступяць з апошнім словам.
Пакуль дзяржабвінаваўца працягвае свой выступ у спрэчках. Яго прамова займае прыблізна 200 старонак.
Цяпер чытаюць
«Я супрацоўнік КДБ, у вас будуць праблемы». Мінчанка хацела напісаць скаргу ў оптыцы, але супрацоўніца паказала корачку21
Каментары