Паротнікаў: «Рускі свет» марыць не проста пра паглынанне беларускай дзяржавы, а пра знішчэнне або выгнанне носьбітаў нацыянальнай свядомасці
Кіраўнік аналітычнага праекта Belarus Security Blog Андрэй Паротнікаў на сваёй старонцы ў фэйсбуку пракаментаваў затрыманне трох чалавек, якія пісалі для расійскага агенцтва Regnum.
«Затрымалі не прыхільнікаў саюза з Расіяй ці аматараў расійскай славеснасці. Затрымалі персанажаў, якія заклікалі да знішчэння беларускай дзяржавы. Можна па-рознаму ставіцца да існуючага парадку рэчаў у Беларусі, але факт заключаецца ў тым, што знішчэнне яе дзяржаўнасці суправаджалася б гібеллю дзясяткаў, а, хутчэй за ўсё, сотняў тысяч нашых суайчыннікаў. «Рускі свет» у абліччы сваіх адэптаў марыць не проста пра паглынанне беларускай дзяржавы, але і пра знішчэнне або выгнанне носьбітаў беларускай нацыянальнай самасвядомасці», — піша Паротнікаў.
«Гэта тое, што на Захадзе называюць «злачынствамі нянавісці». Такім чынам, затрыманыя суб'екты не з'яўляюцца ні пакутнікамі за свабоду слова, ні палітвязнямі. Палітычна і юрыдычна пазіцыя беларускіх уладаў бездакорная», — дадае ён.
Паротнікаў таксама лічыць, што кіраўніца кампаніі «Наш дом» Вольга Карач і кандыдатка на прэзідэнцкіх выбарах 2015 году Таццяна Караткевіч, якія выступілі ў абарону затрыманых, «сябе пахавалі ў якасці палітыкаў у гэтай краіне. Бо па факце выступілі ЗА знішчэнне дзяржавы, якую нібыта прэтэндуюць узначаліць, ЗА забойства сотняў тысяч яе грамадзян. Усё роўна, з якой прычыны гэта было зроблена: за грошы, па дурасці ці з каштоўнасных меркаванняў. Пасля гэтага іх палітычная кар'ера скончана».
«Безумоўна, гэта не выключае дыскусіі адносна геапалітычнай арыентацыі краіны: Расія, Захад ці ізаляцыянізм (асабіста я — ізаляцыяніст). Але базай гэтай дыскусіі можа быць толькі пабудова самастойнай, эканамічна і тэхналагічна развітой нацыянальнай беларускай дзяржавы», — піша Андрэй Паротнікаў.
Цяпер чытаюць
У Кіеве за шпіянаж арыштавалі беларускую журналістку Іну Кардаш. Кажуць, з 2015 года яна працавала на КДБ17
Каментары