Вярхоўны суд скараціў тэрміны некаторым фігурантам «Справы 17-ці». Былым сілавікам — на 6 гадоў
Вярхоўны суд змякчыў прысуд галоўнаму фігуранту нашумелай «Справы сямнаццаці» Канстанціну Вілюгу. Замест 20 гадоў, да якіх яго прысудзіў Мінгарсуд, Вілюга правядзе ў калоніі ўзмоцненага рэжыму 19. Былым супрацоўнікам праваахоўных органаў тэрмін скарочаны на 6 гадоў.
Былому супрацоўніку КДБ Дзмітрыю Вераценскаму тэрмін пакарання скарочаны з 15 гадоў да 9, яго экс-калегу Ігару Карыцкаму — з 14 гадоў да 8. Былы супрацоўнік МУС Канстанцін Дзенісевіч таксама правядзе ў калоніі ўзмоцненага рэжыму 8 гадоў замест 14. Тэрміны пакарання астатніх фігурантаў «Справы сямнаццаці» засталіся без змены.
Вярхоўны суд выключыў з абвінавачання шэраг эпізодаў, звязаных з распаўсюджваннем асоба небяспечных рэчываў, а таксама фармулёўкі «арганізацыя злачыннай групоўкі» і «перавышэнне службовых паўнамоцтваў».
Прысуд уступіў у сілу, аднак ён можа быць абскарджаны на працягу трох гадоў у наглядным парадку.
Нагадаем, Вярхоўны суд пачаў разглядаць апеляцыйныя скаргі на прысуд па «Справе сямнаццаці» 26 мая. У скаргах абвінавачаныя прасілі адмяніць прысуд і адправіць справу на новы разгляд, а то і зусім спыніць. На думку Канстанціна Вілюгі, крымінальную справу распачалі беспадстаўна, а сведкі боку абвінавачаньня усіх агаварылі.
Прысуд абскардзілі не ўсё — выключэнне склалі Марат Багель (ключавы сведка абвінавачання), а таксама Валерый Страбкоў і Фёдар Артамонаў. Яны атрымалі найменшыя тэрміны - 2 гады пазбаўлення і 4 гады абмежавання волі без накіравання ў папраўчую ўстанову.
Нагадаем, Мінскі гарадскі суд вынес прысуд па «Справе сямнаццаці» ў снежні 2016 года. Галоўнаму фігуранту Канстанціну Вілюгу было прызначана пакаранне ў выглядзе 20 гадоў пазбаўлення волі ва ўмовах ўзмоцненага рэжыму. Былым супрацоўнікам КДБ — Дзмітрыю Вераценскаму — 15 гадоў ўзмоцненага рэжыму, а Ігару Карыцкаму — 14 гадоў. Канстанцін Дзенісевіч, у мінулым супрацоўнік МУС, атрымаў 14 гадоў ўзмоцненага рэжыму.
Канстанціна Вілюгу абвінавачвалі ў стварэнні і кіраўніцтве міжнароднай злачыннай арганізацыяй, якая займалася абаротам псіхатропных рэчываў і незаконнай прадпрымальніцкай дзейнасцю са студзеня 2011 года па лістапад 2014 га. Яго ж абвінавачвалі ва ўцягванні ў незаконную дзейнасць іншых грамадзян (астатніх абвінавачаных па справе), сярод якіх — цяпер ужо былыя праваахоўнік Канстанцін Дзенісевіч з МУС, а таксама Дзмітрый Вераценскі і Ігар Карыцкі з КДБ.
Каментары