Моладзь у Брэсце робіць грошы на пачуццях расійскіх турыстаў ФОТЫ
Традыцыйна перад 9 Мая Брэсцкую крэпасць наведваюць тысячы турыстаў з Расіі. «Расійскі сезон» расцягваецца на ўсю першую дэкаду месяца. Ён прыносіць добры даход аграсядзібам, гатэлям, казіно, а таксама проста прадпрымальным маладым людзям.
Напярэдадні Дня Перамогі ў Брэсцкай крэпасці — пік турыстычнага сезона.
На паркоўцы перад уваходнай брамай малады хлопец гандлюе «сімволікай перамогі»: чырвонымі сцяжкамі з «георгіеўскім» фальклорам, магніцікамі і пілоткамі.
Сабекошт гэтага шырспажыву капеечны, але турысты не шкадуюць грошай у сімвалічным месцы.
Гандаль вядзецца без чэкаў і касавых апаратаў, бо ніхто не будзе правяраць прадаўцоў у «святым для кожнага савецкага чалавека месцы».
Улады Беларусі сочаць за тым, каб у публічнай прасторы гарадоў, у тым ліку і Брэста, дамінавала беларуская сімволіка, у тым ліку «кветка мірнага жыцця» — яблыневы цвет на фоне беларускага сцяга. Але расійскім турыстам ніхто не перашкаджае выказваць свае пачуцці, хоць па начах георгіеўскія стужкі ціха здымаюць.
Для пабудовы Брэсцкай крэпасці ў ХІХ ст. расійскія ўлады знеслі стары — гатычны і барочны Берасць — у тым ліку замак і Мікалаеўскую царкву, у якой у 1596 годзе была заключаная Берасцейская унія. У 1941 годзе шматлікі гарнізон крэпасці ў першыя ж гадзіны вайны аказаўся ў нямецкім акружэнні і некалькі тыдняў абараняўся (сам горад Брэст немцы захапілі за некалькі гадзін). Пасля вайны савецкія ўлады надалі крэпасці званне «крэпасць-герой». У цытадэлі быў створаны мемарыял, для стварэння большага эфекту некаторыя будынкі знеслі да стану руін. Такі лёс напаткаў, у прыватнасці, Белы палац — былы ўніяцкі базыльянскі манастыр, у якім у 1918 годзе быў падпісаны Берасцейскі мір. Мемарыял Брэсцкай крэпасці стаў помнікам трагізму першых месяцаў вайны, калі абяскроўленая сталінскімі рэпрэсіямі армія толькі цаной жахлівых страт спыніла наступ нацыстаў.
Каментары