У Маскве ў чацвер затрымалі спецыяльнага карэспандэнта «Медузы» Івана Галунова. Як распавёў Рускай службе Бі-бі-сі адвакат Дзмітрый Джулай, Галуноў быў затрыманы ў 14:30 6 чэрвеня, калі накіроўваўся на сустрэчу з крыніцай.
Па словах адваката, журналіста затрымалі некалькі аператыўнікаў, пры вобшуку яны нібыта знайшлі ў яго ў заплечніку скрутак з наркатычным рэчывам. Пазней яшчэ адзін скрутак быў знойдзены пры вобшуку ў кватэры Галунова.
Карэспандэнта даставілі ў аддзел паліцыі, дзе яму паведамілі, што ён падазраецца ў здзяйсненні злачынства, прадугледжанага артыкулам 228.1 Крымінальнага кодэксу (незаконныя вытворчасць, збыт або перасылка наркатычных сродкаў, псіхатропных рэчываў або іх аналагаў).
Як распавёў Бі-бі-сі следчы Ігар Лапацін, Галуноў затрыманы пры замаху на збыт мефедрону. РБК ў прэс-службе сталічнага ўпраўлення МУС паведамілі, што Галуноў «быў затрыманы на Цвятным бульвары ў ходзе аператыўна-вышуковых мерапрыемстваў».
У ведамстве сцвярджаюць, што пры асабістым надглядзе ў Галунова былі выяўленыя пяць скруткаў з парашкападобным рэчывам, а пры ператрусе дома — яшчэ тры пакеты, скрутак з парашкападобным рэчывам і шалі.
Затрыманы журналіст віны не прызнае і лічыць гэта правакацыяй. Ён заявіў, што аператыўнікі спрацавалі «вельмі кепска».
Meduza выпусціла заяву, у якой піша, што не сумняваецца ў невінаватасці Галунова. Ён паспеў паведаміць выданню праз сяброў, што яму падкінулі два пакеты з невядомым рэчывам. Па словах Галунова, яму не далі патэлефанаваць з яго тэлефона і выклікаць адваката.
Пераслед журналіста выданне звязвае з яго працай. «Мы ведаем, што ў апошнія месяцы Ваню паступалі пагрозы; ведаем, у сувязі з нейкім тэкстам, здагадваемся, ад каго».
Каментары