Уладзімір Замяталін, які памёр 7 ліпеня ва ўзросце 71 года, на выбарах 1994 года быў у камандзе прэм'ер-міністра Вячаслава Кебіча. Ужо потым ён сышоў да Аляксандра Лукашэнкі.
Вячаслаў Кебіч даведаўся пра смерць Замяталіна ад «Нашай Нівы».
Вячаслаў Кебіч: Колькі яму гадоў было?
«НН»: 71 год.
ВК: Рана сыходзіць, вельмі рана… Ён стараўся, рабіў усё, што ад яго патрабавалася. У яго атрымлівалася шмат што, але былі такія часы, калі нават дзе і памыліўся, то не трэба яго за гэта дакараць. Магу сказаць пра яго толькі добрае: руплівы і граматны чалавек быў.
Так, гэта ён прыдумваў хады для маёй перадвыбарчай кампаніі. Было такое. Гэта ён запусціў калісьці «качку», што Лукашэнка скраў фен у сцюардэсы. Але сёння я б не хацеў пра гэта доўга казаць.
Перад тым, як пайсці ў іншую каманду, ён прыйшоў да мяне і спытаў дазволу, гэта робіць яму гонар. Ён спытаў: «Вы не будзеце супраць, калі я сыйду?» Я ж разумеў, што жыць трэба. А то некаторыя не проста кідалі, але яшчэ і брахаць пачыналі.
«НН»: Ці любіў ён Беларусь? Аляксандр Фядута кажа, што так і не змог палюбіць Беларусь, бо яго радзімай быў СССР.
Вячаслаў Кебіч: Бадай што я згаджуся з Фядутам.
***
Што за гісторыя была з фенам?
У 1994 годзе ў разгар прэзідэнцкай кампаніі на экранах тэлебачання з’явіўся ролік, у якім кандыдата Лукашэнку абвінавачвалі ў крадзяжы фена ў сцюардэсы.
Сам Лукашэнка на гэта адказваў: «Навошта мне фен? Я ж лысы!» Але «чорны піяр» не спрацаваў, людзі не паверылі ўсяму гэтаму.
Дэпутат Вярхоўнага Савету ад Апазіцыі БНФ Сяргей Навумчык сцвярджае, што гісторыя з фенам сапраўды была. У 1992 годзе група чыноўнікаў, а таксама дэпутатаў Вярхоўнага Савета лятала ў Кітай. Прычым не ўрадавым самалётам.
Сцюардэса паскардзілася Кебічу, што ў яе прапаў фен. Тады прэм’ер-міністр загадаў праверыць кожны багаж, пачынаючы са свайго, і нібыта фен знайшоўся ў валізе Лукашэнкі. Але сам дэпутат Лукашэнка сказаў, што гэта атрымалася выпадкова, таму ніякіх наступстваў гэта не мела.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім13
Каментары