Затрымалі звольненых за свае выказванні з тэлебачання Дзяніса Дудзінскага і Дзмітрыя Кахно
У Мінску затрыманыя шоўмены і вядучыя Дзяніс Дудзінскі і Дзмітрый Кахно. Прычыны затрымання, а таксама што за сілавыя ведамствы да гэтага датычныя — пакуль невядома, піша Tut.by.
Што Дзяніс Дудзінскі затрыманы, нам пацвердзіла крыніца. Абставіны здарэння яна не паведаміла.
Што тычыцца Дзмітрыя Кахно, то яго затрымалі, калі ён выходзіў з пад'езда і сядаў у машыну: «Пад'ехаў чорны мікрааўтобус, выбег атрад у поўным абмундзіраванні, маму пакінулі, а Дзмітрыя зацягнулі ў бус».
Вядучы тэлеперадачы «Удача ў прыдачу» на тэлеканале АНТ Дзмітрый Кахно застаўся без эфіраў пасля эмацыйнага паста ў сацыяльных сетках з нагоды затрыманняў каля крамы Symbal.by. Пазней ён звярнуўся з адкрытым лістом да калег, якія яшчэ працуюць на беларускім тэлебачанні. Тых, хто «не можа нармальна спаць па начах», шоўмен заклікаў «зрабіць крок, без скандалаў і гучных заяў», гэта значыць звольніцца. Дзмітрый паабяцаў, што асабіста заступіцца за кожнага з іх.
Дудзінскі таксама пацярпеў з-за адкрытага выказвання свайго меркавання. Пасля паста Дзяніса аб затрыманнях каля крамы Symbal.by стала вядома, што ён з жонкай Кацярынай Раецкай адхілены ад вядзення «Славянскага базару». Пазней стала вядома, што яго звольнілі з БТ.
Нагадаем, 1 верасня, наведваючы Баранавічы, Лукашэнка пракаментаваў сітуацыю сыходу журналістаў з дзяржаўных СМІ. Ён заявіў, што яны «хайпанулі» на сітуацыі. На ягоную думку, журналісты загадзя прынялі пастанову пакінуць свае тэлеканалы і проста чакалі моманту, каб вярнуцца ўжо на нагрэтыя месцы.
— І не трэба прыдумляць, што пайшла нейкая хваля — кагосьці пакрыўдзілі, кагосьці збілі. Не ў гэтым справа. Яны даўно ведалі, што трэба рабіць. Хай робяць, мы ім далі свабоду, — заявіў Лукашэнка.
Цяпер чытаюць
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну77
Каментары