«Я абавязкова вярнуся». Гамяльчанка, у якую на акцыі пратэсту трапіла светлашумавая граната, з'ехала з Беларусі
Больш за месяц правяла ў сталічнай бальніцы 19-гадовая гамяльчанка Марыя Зайцава. Як стала вядома «Моцным Навінам», дзяўчына выпісалася з бальніцы і з'ехала з краіны.
Нагадаем, Маша прыехала ў Мінск 9 жніўня, у дзень выбараў прэзідэнта, і ўвечары прыняла ўдзел у мірным пратэсце. Усё здарылася на праспекце Пераможцаў у раёне стэлы «Мінск — горад-герой», калі сілавікі ўжылі вадамёт і абстралялі людзей, якія не былі агрэсіўнымі.
Марыя аказалася ў ліку першых пацярпелых: каля яе выбухнула светлашумавая граната, таксама яна атрымала тры кулявыя раненні. У бальніцу дзяўчыну прывезла «хуткая» ў беспрытомным стане. У рэанімацыі Марыя правяла некалькі дзён, затым яе перавялі ў нейрахірургічнае аддзяленне.
Акрамя агульнага лячэння гамяльчанка перанесла дзве аперацыі па выдаленні змярцвелых тканак вакол ран, якія засталіся пасля гумавых куль. Больш за ўсё дзяўчыну турбаваў слых: яна аглухла на правае вуха. Гэтая праблема і стала падставай для працягу лячэння за мяжой.
Цяпер Марыя Зайцава знаходзіцца ў Чэхіі. У гутарцы з карэспандэнтам «Моцных Навін» гамяльчанка паведаміла, што рыхтуецца да аперацыі па аднаўленні слыху. У цэлым яна адчувае сябе нармальна, вось толькі «рана на сцягне ад гумавай кулі яшчэ не зацягнулася».
Заставацца за мяжой дзяўчына не збіраецца. «Пасля выздараўлення я абавязкова вярнуся ў Беларусь», — сказала яна. Марыя не шкадуе аб здарэнні і спадзяецца, што гэта было не дарма.
Нагадаем, Чэхія адной з першых краін ЕС прапанавала бясплатную медыцынскую дапамогу і рэабілітацыю беларусам, якія пацярпелі падчас і пасля акцыяў 9 жніўня. На гэтыя мэты ўрад выдзеліў больш за паўмільёна даляраў.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары