Разгляд справы пачалося а 10:30 у судзе Кастрычніцкага раёна Мінска. Абвінавачанымі па ёй праходзяць 12 чалавек. Каля суда сабраліся сотні людзей.
Гэта Марыя Каленік, Ксенія Сырамалот, Кася Будзько, Яна Арабейка, Ягор Канецкі, Глеб Фіцнэр, Ілля Трахтэнберг, Вікторыя Гранкоўская, Настасся Булыбенка, Таццяна Якельчык, а таксама выкладчыца БДУІР Вольга Філатчанкава і выпускніца БДМУ, сябра Каардынацыйнай рады, прадстаўніца Святланы Ціханоўскай па справах моладзі і студэнтаў Алана Гебрэмарыям.
Іх усіх абвінавачваюць (масавыя акцыі прайшлі ў пачатку верасня) у арганізацыі дзеянняў, якія груба парушаюць грамадскі парадак і спалучаюцца з відавочным непадпарадкаваннем законным патрабаванням прадстаўнікоў улады, што прывяло да парушэння працы ўстаноў і транспарту (частка 1 артыкула 342 КК). Пакаранне па артыкуле прадугледжвае штраф, арышт, абмежаванне волі на тэрмін да трох гадоў або пазбаўленне волі на такі ж тэрмін.
Раней Генпракуратура паведамляла, што абвінавачаныя выпрацавалі план для дасягнення «супрацьпраўнага выніку» і прымалі меры для яго рэалізацыі з прыцягненнем студэнтаў і выкладчыкаў да ўдзелу ў «супрацьпраўных дзеяннях»; інфармацыйнае забеспячэнне акцый пратэсту ды інш.
Мэтай было распаўсюдзіць «ілжывую інфармацыю аб колькасці пратэстоўцаў, спрыяць дасягненню відавочнага для абвінавачаных супрацьпраўнага выніку: непадпарадкавання законным патрабаванням адміністрацыі ВНУ, у якім праводзіліся акцыі пратэсту».
Дзевяць студэнтаў, а таксама Алану Гебрэмарыям і Вольгу Філатчанкову затрымалі 12 лістапада 2020 года. Пазней у лістападзе была затрыманая яшчэ адна студэнтка мехмата БДУ.
Каментары