Залішняя смяротнасць у Беларусі магла скласці 32 тысячы чалавек — даныя ўцечкі
Настоящее Время правяло даследаванне даных, атрыманых ад «Кіберпартызанаў» — хакераў, якія заявілі пра ўзлом сістэмы «Пашпарт» у Беларусі. Яно паказвае, што з сакавіка 2020 года да сакавіка 2021 года залішняя смяротнасць у краіне склала 32 тысячы чалавек — у 14 разоў больш, чым паведамлялі ўлады.
Інфармацыя, якая аналізуецца ў гэтым артыкуле, атрыманая шляхам узлому масіву персанальных звестак грамадзян Беларусі. Выкарыстанне шкодных праграм у Крымінальным кодэксе Беларусі караецца тэрмінам да 10 гадоў, а несанкцыянаваны доступ да камп'ютарнай інфармацыі — да двух гадоў. У МУС Беларусі не адказалі на запыт Настоящему Времени з нагоды гэтага ўзлому.
«Кіберпартызаны» ў ліпені 2021 года распавялі аб узломе масіву даных з усімі персанальнымі звесткамі беларусаў — інфармацыйнай сістэмы «Пашпарт». Хакеры сцвярджаюць, што фізічна трапілі на аб'екты МУС Беларусі, «адкрылі некалькі доступаў» ва ўнутраныя сеткі і «працягваюць працаваць у іх», нягледзячы на спробы ўладаў спыніць уцечкі.
«Кіберпартызаны» падзяліліся з Настоящим Временем масівам персанальных даных 1,4 млн беларусаў, памерлых са студзеня 2010-га да сакавіка 2021 года.
Да эпідэміі каранавіруса звесткі аб смяротнасці з АІС «Пашпарт» мала адрозніваліся ад таго, што публікаваў Нацыянальны статыстычны камітэт (Белстат). Так, паводле даных, злітых з пашпартнай сістэмы, у 2019 годзе ў Беларусі памерла 121 515 чалавек, а паводле Белстата — 120 913 чалавек.
Белстат не публікаваў новыя звесткі аб смяротнасці з чэрвеня 2020 года. Ва ўцечцы АІС «Пашпарт» звесткі абрываюцца 31 сакавіка 2021 года. Да гэтага — у лістападзе, снежні і студзені — бачная рэкордная месячная смяротнасць у параўнанні з данымі, прынамсі, з 2008 года. У 2020 годзе, калі зыходзіць з уцечкі, у Беларусі памерла 145 тысяч чалавек — гэта найвышэйшы паказчык у пасляваеннай гісторыі краіны, акрамя 2002 года, калі ў сілу розных дэмаграфічных абставінаў, у першую чаргу старэння насельніцтва, памерла 146 тысяч.
Колькі ж людзей памерлі ад каранавіруса? Афіцыйна ў 2020 годзе — 1424 чалавекі, а да канца сакавіка 2021-га — 2247. Але паводле паказчыкаў залішняй смяротнасці («залаты стандарт», па якім вызначаюць маштабы эпідэміі) — на парадак больш. У Беларусі ў 2020 годзе залішняя смяротнасць склала 25 тысяч чалавек. Гэта рэальная смяротнасць (145 тысяч) мінус прагназаваная смяротнасць на аснове даных папярэдніх гадоў (120 тысяч).
25 тысяч чалавек за 2020 год — гэта ў 17 разоў больш, чым кажуць беларускія ўлады.
Залішняя смяротнасць з канца сакавіка 2020-га па канец сакавіка 2021-га склала 32 тысячы чалавек. Гэта ў 14,4 раза больш, чым сведчаць афіцыйныя даныя.
25 снежня 2020 года Лукашэнка заявіў, што не збіраецца прышчапляцца ад каранавіруса. У гэты дзень, згодна з уцечкай, у краіне памерлі 496 чалавек. Для параўнання, у той жа дзень годам раней памерла на 141 чалавека менш.
У Міністэрстве аховы здароўя Беларусі не адказалі на запыт Настоящего времени.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі23
Каментары