Ігумення Гаўрыіла перахрысціла дзяцей курдскіх мігрантаў — так можна было? Спыталі ў муфтыя, што кажа іслам
Некалькі тысяч іракскіх курдаў працягваюць спробы трапіць у ЕС. Пасля кідання камянёў у палякаў на памежным пераходзе Брузгі, частка мігрантаў паехала адпачываць у памяшканне лагістычнага цэнтра, якое ім прадаставілі беларускія ўлады. Туды прыехала ігумення Гаўрыіла, настаяцельніца гродзенскага Свята-Раства-Багародзіцкага жаночага манастыра. З вялікім праваслаўным крыжам у руках яна раздавала дзецям шакаладкі, пасля чаго перахрышчвала малых. Сярод курдаў шмат мусульман — ці дазволеныя такія паводзіны ў дачыненні да іх дзяцей?
Муфтый Алі Варановіч тлумачыць:
«Тут адказнасць на сябе бяруць бацькі дзяцей, якія былі побач. Але я не бачыў гэтай сітуацыі, таму цяжка сказаць дакладней.
Таму адзначу такі момант — у ісламе ўсе дзеці, якія не дасягнулі паўналетняга ўзросту, лічацца мусульманамі. Паўналецце тут маецца на ўвазе не 18-годдзе, а палавое саспяванне, то-бок, недзе 11-13 гадоў. Пасля ўжо ў іх ёсць выбар веравызнання.
І па ісламу, якія б абрады над дзецьмі ні праводзяцца, хрысці ці ні хрысці, гэта ні на што не ўплывае, дзеці працягваюць заставацца мусульманамі. Таму і пасля ніякіх адмысловых абрадаў праводзіць не трэба».
Таксама шмат здзіўленых каментараў выклікала раздача ежы, калі беларускія ўлады прывозілі мігрантам каўбасу і сасіскі. У асноўным, чытачы цікавіліся: а ці дакладна тое халяль, дазволеная мусульманам ежа, не свініна?
Але ж, аказваецца, у такой сітуацыі іслам дазваляе есці любую ежу.
«У экстрэмальных умовах можна есці нават і свініну, асабліва калі ёсць пагроза жыццю ці здароўю мусульманіна, — кажа Варановіч. — Тут няма праблемы. Каб захаваць жыццё мусульманін нават абавязаны есці тое, што ёсць, у тым ліку і забароненае.
У свой час, калі я служыў у войску, да нас трапіў узбек. Тыдзень ён не еў стравы з мясцовай сталоўкі, а пасля пачаў есці. З яго пасміхаліся, але ён усё правільна зрабіў — каб захаваць здароўе, пры адсутнасці выбару, мусульманін павінен зрабіць усё магчымае».
Чытайце таксама:
Да мігрантаў у Брузгі прыехала ігумення Гаўрыіла ВІДЭА
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам4444
Каментары