Журналісты спыталі Вадзіма Гігіна, чаму Расія бамбіць рускамоўны Харкаў
Журналісты рускамоўнага YouTube-праекта «Freedom UATV» у жывым эфіры пагаварылі з экс-дэканам факультэта філасофіі і сацыяльных навук БДУ Вадзімам Гігіным пра Рыгора Азаронка, «спецыяльную ваенную аперацыю» і «дэнацыфікацыю». Размова не задалася і скончылася пажаданнем беларускаму спікеру адправіцца ўслед за рускім ваенным караблём. «Зеркало» паслухала іх гутарку.
Украінскія журналісты патэлефанавалі цяперашняму дырэктару беларускага таварыства «Веды» Вадзіму Гігіну, каб спытаць «Рыгор Азаронак — гэта што ўвогуле».
‒ Рыгора я асабіста ведаю. Гэта патрыёт сваёй краіны. Ён неаднаразова даказваў гэта. І тое, што на яго накіраваны стрэлы праціўнікаў беларускай дзяржаўнасці, сведчыць пра тое, што ён якасна і дастойна робіць сваю работу. […] Рыгор прадстаўляе такі ідэалагічны вектар. Ён заўсёды паслядоўна крытыкуе захад. Гэта чалавек, які прытрымліваецца кансерватыўных традыцыйных каштоўнасцей. У яго вялікая колькасць паслядоўнікаў, як на тэрыторыі Беларусі, так у Расіі і, я перакананы, ва Украіне таксама. Ён ідэйна перакананы чалавек. Ён шчыра верыць у тое, пра што кажа, ‒ адказаў Гігін.
Падчас размовы Гігін назваў уварванне «спецыяльнай ваеннай аперацыяй», што выклікала новы віток спрэчак у студыі. Потым экс-дэкан БДУ распавёў пра «украінскія правакацыі», пра якія раней заяўляў Аляксандр Лукашэнка. Вядучыя ў адказ заўважылі, што расейскія Узброеныя сілы ўварваліся ва Украіну ў тым ліку з тэрыторыі Беларусі, хаця сам Лукашэнка неаднаразова заяўляў, што ніякай пагрозы для Украіны з беларускага боку не будзе.
Вадзім Гігін на гэта паўтарыў тэзіс расійскай прапаганды аб тым, што ва Украіне праводзіцца «спецыяльная ваенная аперацыя па дэмілітарызацыі і дэнацыфікацыі», успомніў полк «Азоў». Вядучыя папрасілі суразмоўцу не распаўсюджваць дэзінфармацыю і спыталі, каго расійскае войска «дэнацыфікуе» ў рускамоўных гарадах Украіны.
‒ Пра якую дэнацыфікацыі ідзе гаворка, калі з вашага папушчальніцтва пускаюць ракеты на Харкаў ‒ цалкам рускамоўны горад? ‒ задаў пытанне вядучы.
‒ Што тычыцца Рэспублікі Беларусь. Расейская Федэрацыя з'яўляецца нашым саюзнікам і сапраўды…
‒ Чаму вы пускаеце ракеты на Харкаў? Каго вы там «дэнацыфікуеце»? Цалкам рускамоўны горад, ‒ паўтарыў пытанне вядучы.
‒ Калі вы задаяце пытанне …, ‒ пачаў абурацца Гігін, але на гэтым сувязь перапынілася і спікер знік з эфіру. Праз некалькі секунд ён вярнуўся. ‒ Гэта кажа наогул аб вашым уяўленні аб свабодзе слова, калі вы перабіваеце праз пяць секунд пасля таго, як задалі пытанне…
‒ Я хачу пачуць адказ на сваё пытанне, ‒ паўтарыў украінскі журналіст.
‒ Я адказваю на ваша пытанне. Вы мне дайце хаця б 10 секунд і не перабівайце. Такім чынам. Што да Рэспублікі Беларусь. Расейская Федэрацыя ‒ наш саюзнік. Тыя мэты, якія ставіць Расійская Федэрацыя, як я бачу, большасць палітычных сіл Беларусі і кіраўніцтва нашай краіны падзяляе… ‒ на гэтым дзесяць секунд, пра якія прасіў Гігін для адказу, скончыліся.
‒ Вадзім, пытанне гучыць так: Рускамоўны Харкаў, чаму вы на яго спускаеце ракеты і падтрымліваеце гэтую палітыку. Адказ будзе?
‒ Вы мяне [неразборліва] да адказу. А так у вас не атрымаецца. Не атрымаецца ў вас так. Я буду адказваць так, як бачу сітуацыю…
‒ Вадзім, у цэлым зразумелая ваша пазіцыя. Спадзяюся, што большасць беларускага грамадства не падзяляе яе. Усяго вам добрага! Шчасця вам! Кірунак руху ваеннага карабля расійскага вам добра вядома, ‒ развітаўся з Вадзімам Гігіным другі вядучы.
‒ Я лічу, што вельмі важна, каб гэтыя людзі ў эфіры паказвалі сваё глупства. Чалавек кажа пра Марыупаль, пра нацыстаў — цалкам расейскімі наратывамі. Але на пытанне, чаму яны пускаюць ракеты на рускамоўныя гарады, пачынаюць сыходзіць у нейкую філасофію і крычаць, — выказаў першы вядучы сваё меркаванне аб экс-дэкане факультэта філасофіі і сацыяльных навук БДУ.
Каментары