За перадачу даных пра рух расійскай вайсковай тэхнікі на Гомельшчыне распачата яшчэ сем крымінальных спраў
З пачатку гэтага года ў Гомельскай вобласці распачата сем крымінальных спраў з афіцыйна фармулёўкай «аб садзейнічанні экстрэмісцкай дзейнасці, звязанай з перадачай адміністратарам інтэрнэт-рэсурсаў звестак аб тактычных манеўрах вайсковай тэхнікі». Сярод падазраваных і непаўналетні хлопец.
Як паведамляе СК, у Хойніцкім раёне 49-гадовая жанчына перадавала адміністратарам антываеннага Telegram-канала інфармацыю аб відах і маршрутах перамяшчэння вайсковай тэхнікі.
Мазырскім раённым аддзелам Следчага камітэта абвінавачванне ў садзейнічанні экстрэмісцкай дзейнасці прадʼяўленае і 28-гадовай жыхарцы Мазыра. Маці малалетняй дзяўчынкі зняла і пераслала ў тэлеграм-канал відэа з перамяшчэннем верталётаў. Цяпер жанчына знаходзіцца ў следчым ізалятары.
Мера стрымання ў выглядзе заключэння пад варту прымененая і да вучня прафесійнага ліцэя. Непаўналетні ўраджэнец Мазыра скінуў у «экстрэмісцкі» інфармацыйны канал відэа з перамяшчэннем ваеннай тэхнікі. Ён знаходзіцца ў статусе абвінавачанага.
У Гомелі 31-гадовы творчы работнік адпраўляў антываенным каналам фатаграфіі і відэафайлы аб руху транспартных сродкаў вайсковага прызначэння.
У гэтым жа падазраецца і 37-гадовы гомельскі таксіст.
Днямі фігурантамі крымінальных спраў паводле ч. 1 арт. 361-4 (садзейнічанне экстрэмісцкай дзейнасці) Крымінальнага кодэкса Рэспублікі Беларусь сталі яшчэ два жыхары Гомеля ва ўзросце 44 і 30 гадоў.
Расія напала на Украіну 24 лютага, у тым ліку з тэрыторыі Беларусі. Гэтае грубае парушэнне міжнароднага права было асуджанае Генеральнай асамблеяй ААН 140 галасамі супраць пяці, сярод гэтых пяці і Беларусь.
У выніку агрэсіі загінулі ўжо дзясяткі тысяч вайскоўцаў з абодвух бакоў, а таксама мірных жыхароў. На акупаваных тэрыторыях адбываюцца сапраўдныя зверствы, іх маштаб стаў вядомы пасля разгрому расійскіх войскаў пад Кіевам.
Згодна з міжнародным правам, Беларусь лічыцца саўдзельніцай агрэсіі, бо прадаставіла сваю тэрыторыю для вядзення вайны.
Расійскія войскі прыбылі на тэрыторыю Беларусі ў студзені-лютым нібыта для правядзення вучэнняў, але, як выявілася, планаваўся захоп Украіны.
«Мяркую, Макей бы ўхваліў». Аўтар помніка кіраўніку МЗС расказаў, якія сэнсы ўклаў у яго1
Каментары