Ціханоўская: Кожны год рэжым апяваў вайну, каб аднойчы дапамагчы Крамлю пачаць новую
«Ужо не важна: падабаецца Бабарыка, Ціханоўскі ці Лукашэнка. Важна захаваць Беларусь і яе сумленнае імя», — Святлана Ціханоўская запісала зварот з нагоды 9 Мая. Ён кардынальна адрозніваецца ад рыторыкі Лукашэнкі.
Яна расказала, што яе прадзед Крывулец Афанасій быў паранены у баі пад Берлінам і памёр 2 мая 1945 года, усяго за некалькі дзён да заканчэння вайны.
«Колькі добрых спраў можна было б зрабіць і колькім героям удзячыць за мір, але рэжым замест гэтага кожны год апяваў саму вайну і перамогу ў ёй, каб аднойчы дапамагчы Крамлю пачаць новую.
І ў Дзень Перамогі мне давядзецца гаварыць з вамі пра тое, што Пуцін і Лукашэнка ўцягнулі Беларусь у вайну, у якой Расію чакае параза».
Ціханоўская нагадала, як пасля заканчэння Другой сусветнай вайны рэпарацыі выплочвала не толькі Германія, але яе краіны-саюзніцы.
«Параза ў вайне — гэта не толькі эканамічныя страты. Сёння для Беларусі гэта значыць быць саюзнікам таго, каго свет запомніць гэтак жа, як памятае фашыстаў. Што б ні казалі па тэлебачанні, ваенныя злачынствы расійскай арміі ўжо даказаны міжнароднымі праваабарончымі арганізацыямі. Тое, што Пуцін робіць з Украінай — гэта бесчалавечная жудасная кара. Кара не толькі мірных украінцаў, але і будучыні Расіі. А разам з ёй і будучыні Беларусі».
Палітык звярнулася з просьбай да беларусаў, у якіх ёсць родныя і знаёмыя ў войску і міліцыі.
«Пагаварыце з імі. Звярніцеся да іх, нават калі пасля 2014-га, 2020-га ці лютага 2022-га вы больш не размаўляеце. Звярніцеся да іх і скажыце, што дыктатары прайграюць гэтую вайну. Што яны захочуць уцягнуць за сабой наш народ, але ім гэтага нельга дазволіць.
Што ўжо не важна: падабаецца Бабарыка, Ціханоўскі ці Лукашэнка. Важна захаваць Беларусь і яе сумленнае імя.
Мае, вашыя, іх дзяды разам гінулі за гэту краіну — дык хіба мы маем права здрадзіць подзвігу тых, дзякуючы каму мы з'явіліся на гэты свет?» — скончыла свой зварот Ціханоўская.
На Дзень Перамогі Лукашэнка выступіў з агрэсіўнай прамовай, зневажаў Украіну і краіны Захаду
Цяпер чытаюць
Як у галечы співалася радня Лукашэнкі? Малавядомыя факты29
Каментары