Ад мастака Алеся Пушкіна прыйшоў першы і пакуль адзіны ліст з калоніі. Акрамя таго, ён пару разоў вельмі коратка званіў. Але ўвогуле вестак ад яго даўно не было, паведаміла жонка мастака Яніна Пушкіна «Народнай волі».
Арыштаваны Пушкін быў у сакавіку 2021 года і правёў у СІЗА цэлы год. 30 сакавіка мастак быў асуджаны на 5 гадоў калоніі строгага рэжыму. Яго прызналі вінаватым у «наўмысных дзеяннях у рэабілітацыі нацызму, учыненых групай асоб» і ў «здзеку з дзяржаўных сімвалаў». Падставай для абвінавачанняў сталі карціны з цыкла «Беларускі супраціў» і перформанс, які ён правёў ва Украіне.
У красавіку Алеся Пушкіна адправілі ў папраўчую калонію №22 у Івацэвіцкі раён («Воўчыя норы»).
«За ўвесь час, пакуль муж у «Воўчых норах», ад яго прыйшоў усяго адзін ліст, — кажа Яніна Пушкіна. — Амаль месяц ужо наогул няма ніякіх вестак — ні лістоў, ні званка, таму не выключаю, што Алеся змясцілі ў штрафны ізалятар. Адваката ў яго няма, таму няма каму і даведацца, што там адбываецца.
У адзіным лісце нагадаў, што яму прывезці: спартыўны касцюм, тэлефонную картку. Здаецца, раз на тыдзень дазволена тэлефанаваць з калоніі дадому, але апошнім часам званкоў няма.
Толькі два разы пазваніў, але гаварылі менш за хвіліну, бо, мабыць, карыстаўся чужой карткай. Паспеў сказаць, што ў калоніі яшчэ горш, чым было ў СІЗА на Валадарскага».
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам25
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары