Як засцерагчы сябе ў VK, Facebook і «Аднакласніках» — падрабязны гайд
«Наша Ніва» ўжо рабіла інструкцыю, як ачысціць свой профіль у Instagram, а таксама разбіралася з месенджарамі Telegram, Viber і WhatsApp. Гэтым разам паклапоцімся пра бяспеку ў класічных сацсетка — VK, Facebook і «Аднакласніках».
«Укантакце»
Сярод старых сацсетак найбольшай папулярнасцю ў беларусаў карыстаецца расійскі VK.
Першае, з чаго можна пачаць, — гэта выгляд старонкі. У бягучых умовах варта рабіць так, каб мага менш людзей маглі бачыць размешчаную інфармацыю. Але варта разумець, што проста зрабіць профіль закрытым — недастаткова, бо не вядома, хто можа атрымаць доступ да акаўнта кагосьці са спісу вашых сяброў. Таму, каб максімальна сябе засцерагчы, трэба націснуць на круглае фота вашага профілю, а затым перайсці ў «Налады» > «Прыватнасць». Там амаль ва ўсіх палях лепей выбраць варыянт «Толькі я», каб нават ніхто з вашых сяброў не бачыў, на якія групы вы падпісаныя, якія вы захоўваеце фота, відэа і г.д.
Наступны крок для бяспекі — пошук каментароў, якія вы пакідалі пад рознымі допісамі. Для гэтага ў VK прадугледжаны даволі зручны і просты механізм.
Каб знайсці пакінутыя вамі каментары і іншыя рэакцыі, трэба перайсці ў «Навіны» і ўжо там у меню з правага боку праглядаць патрэбныя вам віды актыўнасцяў.
Націснуўшы на «Каментарыі», у вас з'явіцца ўвесь спіс публікацый, пад якімі вы некалі пакідалі каментар. Пры неабходнасці вы можаце яго выдаліць. Таксама ў VK ёсць магчымасць прагледзець і іншую вашу актыўнасць. Абраўшы ў меню «Рэакцыі», вы ўбачыце не толькі ўпадабаныя вамі запісы, але і каментары іншых карыстальнікаў, якія вы ацанілі падабайкай.
Наступны крок да бяспекі — прагляд вашай «Сцяны», на якой не толькі вы, але і іншыя карыстальнікі маглі пакідаць допісы. Выдаляць «экстрэміцкія» допісы варта нават у тых выпадках, калі вы зрабілі свой профіль максімальна закрытым.
Апошні вельмі важны крок — ачыстка гісторыі перапісак.
Інтэрфэйс VK дазваляе хутка выдаляць размову, але такім чынам вы выдаляеце яе толькі з гісторыі стасункаў для свайго акаўнта. Аднак VК дае магчымасць выдаляць адпраўленыя вамі паведамленні не толькі ў вас, але і ў суразмоўцы. Для гэтага трэба ўвайсці ў чат, выбраць патрэбнае паведамленне, націснуць на «Выдаліць» і абраць варыянт «Выдаліць ва ўсіх». Ваш суразмоўца больш не будзе бачыць змест паведамлення і нават інфармацыю аб тым, што вы яго выдалілі. Адзінае, што ў яго застанецца, — гэта тыя паведамленні, якія ён дасылаў вам.
Пасля гэтага можна выйсці з дыялогу ў агульны спіс і ўжо там выдаліць саму размову.
Яшчэ адзін раздзел, які варта праверыць на наяўнасць «небяспечнага» кантэнту — «Закладкі». Там сабраны допісы, якія вы калісьці вырашылі захаваць, каб не згубіць у будучыні.
Як і VK, амерыканскі Facebook дазваляе схаваць ад карыстальнікаў амаль усю інфармацыю, размешчаную ў вашым профілі, але разбірацца з усімі наладамі тут крыху цяжэй. Добра, што ўсе гэтыя складанасці кампенсуюцца наяўнасцю памочніка, які хоць і не заўжды простай мовай, але накіроўвае карыстальніка ў патрэбны раздзел меню.
Каб перайсці ў меню з наладамі, вам трэба націснуць на кружок са стрэлкай ▼, абраць «Налады і прыватнасць» > «Прыватнасць». І як і ў выпадку з VK, максімальна абмяжоўваем спіс людзей, якія могуць бачыць змест вашай старонкі.
Каб адшукаць пакінутыя вамі каментары, падабайкі і іншыя віды актыўнасцяў, трэба перайсці ў «Журнал актыўнасці». Там захоўваюцца ўсе вашы дзеянні, пачынаючы ад гісторыі пошукавых запытаў і прагледжанага кантэнту да напісаных каментароў і пастаўленых падабаек.
Механізм выдалення паведамленняў у Facebook стандартны. Тут таксама можна выдаляць цалкам чат, але толькі ў сябе — у суразмоўцы застанецца поўная гісторыя перапіскі. Каб выдаліць адасланае вамі паведамленне, давядзецца заходзіць у дыялог, націскаць на «Выдаліць» і абіраць варыянт «Адмяніць адпраўкі для ўсіх». Пасля чаго замест адпраўленага раней паведамлення ў чаце застанецца надпіс «Вы скасавалі адпраўку паведамлення».
«Аднакласнікі»
Галоўнае адрозненне «Аднакласнікаў» ад Facebook і VK у тым, што пастаўленая падабайка (клас) раўназначная рэпосту — допіс адлюструецца і на вашай старонцы.
Але абноўлены інтэрфэйс сацсеткі дазваляе паставіць «Прыватны клас», што зробіць яго не бачным для іншых карыстальнікаў.
Каб адшукаць раней пастаўленыя «класы», трэба ўвайсці ў браўзеры ў сацыяльную сетку і націснуць на сваё фота, размешчанае ў верхнім правым куце. У меню, якое з'явіцца, націсніце на сваё імя.
Потым трэба ў профілі перайсці ва «Усё».
Шлях да пакінутых вамі каментароў ляжыць у адзеле «Абмеркаванні».
Разабраўшыся з падабайкамі і каментарамі, можна перайсці да наладаў выгляду старонкі. Для гэтага трэба зайсці ў «Налады» і абраць раздзел «Публічнасць». Адзінае, што адразу кідаецца ў вочы, — даволі сціплы спіс пунктаў, якія можна схаваць ад усіх карыстальнікаў. Таму ў пунктах, дзе няма магчымасці абраць варыянт «Толькі я», пакідайце «Толькі сябры».
Што тычыцца ачысткі перапіскі, то яе механізм амаль цалкам такі самы, як ў VK і Facebook. Без дамоўленасці з суразмоўцай, сацсетка дазваляе выдаліць толькі адпраўленыя вамі паведамленні. Пасля чаго можна выдаліць і сам дыялог, але ўжо толькі з вашага боку.
Меры засцярогі з рэпостамі і раздзелам «Захаваныя» у «Аднакласніках» мусяць быць такімі самымі, як і ў іншых дзвюх сетках.
Чытайце таксама:
Як правільна пачысціць свой акаўнт у Instagram, каб не патрапіць пад рэпрэсіі
Telegram і не толькі — як правільна пачысціць месенджары, каб не трапіць пад рэпрэсіі
«Сказаў: я тут нічога прасіць не буду». Жонка расказала, як Верамейчыка прызналі пагрозай у Літве5
Каментары