«Мы заяўляем аб рэзкім узмацненні фізічнага і псіхалагічнага ціску на большасць абвінавачаных па крымінальнай справе №20125030489 (т. зв. «справа групы Аўтуховіча»). Відавочны поўны развал абвінавачвання, і сістэме не застаецца нічога іншага, як узмацніць рэпрэсіі», — гаворыцца ў дакуменце.
Ва ўмовах пагрозы іх жыццям і здароўю падсудныя прынялі рашэнне назваць імёны людзей, якіх яны лічаць вінаватымі:
— палкоўнік КДБ Варанецкі А. І.,
— следчыя Церашонак П. Д., Галавач А. Я., Лаўранчук, Герасімовіч,
— суддзя Філатаў М,
— пракуроры Рабаў У., Герасіменка Л.,
— начальнік турмы №1 Казакоў П. і. намеснік начальніка турмы Станеўскі С. М., начальнік рэжымнага аддзела Коршунаў В. В.
Фігуранты справы вераць, што «ў новай свабоднай Беларусі» дзеі згаданых людзей «будуць ацэненыя народам і правасуддзем».
***
Суд над ваўкавыскім прадпрымальнікам Мікалаем Аўтуховічам праходзіць у гродзенскай турме №1. Разам з ім судзяць 11 чалавек. Улады абвясцілі Аўтуховіча арганізатарам і кіраўніком «тэрарыстычнай групоўкі», якая дзейнічала на тэрыторыі Гродзенскай вобласці і нібыта падпальвала аўтамабілі і дамы супрацоўнікаў міліцыі.
Удзельнікі «групы» абвінавачваюцца па 15 артыкулах Крымінальнага кодэкса, Аўтуховіч — па 10 артыкулах.
