Ля берагоў Партугаліі выявілі самую цяжкую касцявую рыбу ў свеце. Яна важыць амаль тры тоны
Ля берагоў Азорскіх астравоў вылавілі тушу загінулай рыбы-месяца вагой 2744 кілаграма — гэта абсалютны рэкорд для касцявых рыб. Яе вышыня — 3,5 метра, а даўжыня — 3,6. Пра гэта піша Live Science.
Марскія біёлагі ўзважылі рыбу-месяц з дапамогай лябёдкі і прамысловых вагаў, а затым разрэзалі, узяўшы ўзоры ДНК і змесціва страўніка.
Папярэдні рэкорд належаў рыбе-месяцу вагой 2300 кілаграмаў, якую ў 1996 годзе вылавілі ля берагоў Японіі.
Увогуле гэтыя рыбы — самыя цяжкія з сучасных касцявых. Звычайна яны важаць каля двух тон.
Рыба-месяц жыве ў трапічных і ўмераных водах усіх акіянаў. Іх дакладная колькасць невядомая. Увесну і ўлетку папуляцыя на паўночным захадзе Атлантыкі ацэньваецца ў 18 тысяч асобін.
Каментары