Каля 300 кіроўцаў Яндэкс Go ў Мінску засталіся без заробку праз ашуканства
Кіроўцы таксі ў Мінску, якія працавалі на Яндэкс Go, страцілі частку свайго заробку. Таксісты спраўна перавозілі пасажыраў, але, калі надышоў час разліку, кампанія-партнёрка сэрвісу літаральна знікла з «радараў», піша агенцтва «Мінск-Навіны».
Адзін з пацярпелых кіроўцаў распавёў, што некалькі месяцаў таму заключыў дамову з ТАА «Фарысан». Кампанія брала за пасярэдніцкія паслугі 8% ад чэка. Умовы здаваліся прывабнымі, паколькі ў іншых аўтапарках камісія магла складаць удвая больш — да 15 %. А працоўную дамову наймальнік і супрацоўнік падпісалі праз месенджар.
У выніку ж аказалася так, што ў ТАА «Фарысан» таксісту заплацілі толькі за першыя два тыдні працы, а за апошнія сем дзён каля 400 рублёў ён так і не дачакаўся. Кіраўніцтва кампаніі раптам знікла і перастала выходзіць на сувязь.
Пазней высветлілася, што такім чынам пацярпела каля 300 таксістаў. Хтосьці з іх недаатрымаў некалькі дзясяткаў рублёў ад заробку, а хтосьці — да паўтары тысячы. Пра гэта кіроўцы даведаліся ў выніку зносін у працоўным чаце.
Прэс-служба Яндэкс Go пацвердзіла наяўнасць праблемы: кампанія-пасярэднік сапраўды не выходзіць на сувязь, а кіроўцы не могуць атрымаць свае грошы. Пры гэтым, як удакладняецца, сэрвіс пералічыў сродкі своечасова.
У Яндэкс Go прынялі рашэнне па магчымасці дапамагчы пацярпелым таксістам і выказалі надзею, што ашуканыя работнікі цалкам атрымаюць свае грошы.
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы9
Каментары