Манахіні Свята-Елісавецінскага манастыра, якія збіраюць дапамогу расійскім салдатам, ездзяць гандляваць у Польшчу
Актывісты аб'яднання «Рух» запусцілі збор подпісаў, каб забараніць камерцыю манахінь.
Намёт Свята-Елісавецінскага манастыра актывісты заўважылі каля праваслаўных могілак у Варшаве яшчэ на пачатку лістапада. Каля галоўнага ўвахода стаяў іх намёт, дзе прадавалі розныя царкоўныя рэчы.
Але гэты ж мінскі манастыр збірае дапамогу для расійскіх салдат ва Украіне.
У абіцелі актыўна ладзіцца акцыя «Помощь братьям», дзе збіраюць рэчы і грошы для расійскіх акупантаў. На сабраныя сродкі набываюць неабходныя рэчы, лекі і вайсковы рыштунак. Таксама сёстры манастыра пішуць паштовыя лісты падтрымкі расійскім жаўнерам ва Украіне з подпісам: «Дорогому солдату из Белой Руси / Белоруссии».
Духоўнік манастыра протаіерэй Андрэй Лемяшонак вядомы сваімі прарасійскімі і пралукашэнкаўскімі поглядамі.
Сябры «Руху» ладзілі пікет каля манастырскага намёта, а таксама праводзілі тлумачальную размову з патэнцыйнымі пакупнікамі.
Па інфармацыі аб'яднання, прадстаўнікі Свята-Елісавецінскага манастыра хутка прыедуць гандляваць у Польшчу і на калядныя святы. Таму зараз актывісты накіроўваюць пісьмовыя запыты Польскай Праваслаўнай Царкве і прадстаўнікам Каталіцкага Касцёла, каб даведацца, на якіх падставах манахіні атрымліваюць дазвол працаваць на тэрыторыі краіны.
Дадаткова запусцілі збор подпісаў пад петыцыяй супраць прысутнасці ў Польшчы гандлёвых пунктаў Свята-Елісавецінскага манастыра.
Каментары
мона? - стырь ?
яны і ад падаткаў сыходзяць. напрыклад, у іх няма аплаты па безналу