Фота: Louis Hansel / Unsplash

Чым карысная брокалі і чаму яна лічыцца «суперфудам»

Брокалі — разнавіднасць капусты і продак квяцістай капусты. Яна вядомая яшчэ з часоў Старажытнага Рыма. Некалькі стагоддзяў гародніна была распаўсюджаная толькі ў Італіі, але потым яе завезлі ў Францыю і Англію. Брокалі нескладана вырошчваць, і яна вельмі папулярная. Лепш за ўсё расце на ўрадлівай глебе і патрабуе вялікай колькасці сонца.

Брокалі мае вельмі неабходныя нам клятчатку, бялкі, тлушчы, вітаміны А, В, С і К. Таксама яна крыніца магнію, цынку, серы, фосфару, жалеза і кальцыю. Вось некаторыя з карысных уласцівасцяў гэтай гародніны, за якія яе асабліва любяць прыхільнікі здаровага ладу жыцця і вегетарыянцы:

— Брокалі неверагодна багатая на антыаксіданты, таму яе ўжыванне — гэта прафілактыка анкалагічных захворванняў. Харчовыя валокны, на якія багатая цёмна-зялёная капуста, добрыя для вывядзення халестэрыну, лішкаў цукру, канцэрагенаў, якія назапашваюцца з-за ўжывання фастфуду і смажанай ежы.

— Умацоўвае касцявую тканку за кошт высокай канцэнтрацыі кальцыю і магнію. Магній і фосфар дапамагаюць рабіць суставы больш рухомымі і эластычнымі.

— Зніжае рызыку сардэчна-сасудзістых захворванняў. Калій у складзе брокалі патрэбны для здароўя сасудаў і эластычнасці цягліц, у прыватнасці, сардэчнай.

— Аднаўляе і ўмацоўвае нервовую сістэму. Вітаміны групы B неабходныя для здаровага сну і цыркадных рытмаў.

— Дабратворна ўплывае на стрававальны тракт з прычыны багацця на харчовыя валокны.

— Забяспечвае здароўе скуры, валасоў і пазногцяў.

— Дапамагае захаваць і палепшыць зрок дзякуючы высокай колькасці каратыноідаў.

— Для людзей, схільных да дыябету, забяспечвае мяккае зніжэнне ўзроўню цукру ў крыві.

Брокалі варта з асцярожнасцю спажываць людзям, якія хварэюць на гіпафункцыю шчытападобнай залозы, маюць праблемы з падстраўнікавай залозай, падвышаную кіслотнасць страўніка і непераноснасць клятчаткі.

Таксама, калі есці брокалі зашмат і дрэнна яе перажоўваць, можна атрымаць уздуцце жывата і метэарызм. Аднак агулам гэтая гародніна даволі бяспечная для ўжывання ў любым выглядзе.

Як выбраць

Брокалі шырока даступная круглы год, але лепш за ўсё спажываць яе ў сезон — з кастрычніка па красавік. Падчас куплі выбірайце яркія, шчыльныя качаны і цвёрдыя сцяблінкі. Пазбягайце брокалі з жаўтлявымі кветкамі і сухімі або зжаўцелымі канцамі сцёблаў. Брокалі павінна быць свежай: мець роўны зялёны колер, без жоўтых, сіняватых, цёмных плямаў, і шчыльныя зялёныя суквецці.

Капуста выдатна захоўвае карысныя ўласцівасці і смакавыя якасці пасля замарозкі. Мыць гародніну перад замарозкай не трэба.

Гатаванне брокалі

Метады гатавання ўплываюць на колькасць харчовых рэчываў у гародніне. Так, кіпячэнне можа вымыць з брокалі да 90% каштоўных рэчываў. У той жа час гатаванне на пары, смажанне, гатаванне ў фрыцюры і нават у мікрахвалёўцы дапамагаюць захоўваць карысныя рэчывы. Таму, калі вы варыце брокалі, трэба рабіць гэта хутка і адразу ж адкідваць гародніну ў ваду з лёдам, каб захаваць яркі зялёны колер і максімум карысных уласцівасцяў, звяртае ўвагу onet.pl.

Перад тым, як гатаваць брокалі, вызначцеся таксама, хочаце вы гатаваць яе цалкам або нарэзаць на больш дробныя кавалачкі. Некаторыя выкідваюць пладаножку, але можна прыгатаваць яе разам з верхняй часткай брокалі, хоць на гэта і прыйдзецца выдаткаваць больш часу.

Не забудзьцеся загадзя прамыць брокалі, каб выдаліць пясок і дробныя часцінкі глебы.

Фота: Zichrini / Pixabay

Ці можна есці брокалі сырой?

Брокалі можна есці сырой, але не ўсе любяць адчуваць цвёрдасць гэтай гародніны, і таму мы часцей гатуем яе да мяккасці. Аднак гэта не мяняе таго, што большасць пажыўных рэчываў можна знайсці ў сырой брокалі.

Каб капусту можна было есці сырой, лепш зрабіць наступнае. Ачысціце брокалі ад лісця, прамыйце пад вадой, падзяліце на дробныя часткі і пакладзіце ў каструлю. У чайніку закіпяціце ваду і заліце ​​гародніну кіпнем. Затым трэба пачакаць хвіліну і працадзіць брокалі праз друшляк, паліваючы ​​яе халоднай вадой. Згатаваную такім чынам гародніну можам адразу дадаваць у салату альбо есці без далейшага гатавання. Аднак варта памятаць, што брокалі, згатаваная такім чынам, застанецца цвёрдай.

Свежая брокалі выдатна спалучаецца з сырам, агурком, радыскай, арэхамі, гарбузовымі семкамі і смятанай.

Як зварыць, каб гародніна мінімальна згубіла карысныя ўласцівасці

Трэба наліць у каструлю халодную ваду, каб узровень вады быў вышэйшы за саму гародніну. Затым варта дадаць чайную лыжку солі і ⅓ чайнай лыжкі цукру і далей варыць, накрыўшы вечкам. Час гатавання брокалі 4—8 хвілін, прычым праз 4 хвіліны атрымаецца брокалі, прыгатаваная аль-дэнтэ, а праз 8 хвілін — мяккая, але не перавараная гародніна.

Каб брокалі заставалася свежай і зялёнай, адразу пасля варкі і абсушвання абліце яе халоднай вадой. Прыгатаваную такім чынам гародніну можна падаваць на вячэру разам з іншай гароднінай або класці ў салату з яйкам, кукурузай і сырам фета. Каб уся кампазіцыя заставалася лёгкай, можна заліць яе натуральным ёгуртам, які ідэальна злучыць усе інгрэдыенты ў смачнае цэлае. Калі вас не хвалюе каларыйнасць, лыжка маянэзу надасць страве цікавы смак.

Як пазбегнуць горкага смаку брокалі?

Нягледзячы на ​​​​тое, што гэта рэдкасць, брокалі можа мець горкі прысмак пры варцы. Калі такая праблема здарылася некалькі разоў запар, вам варта змяніць спосаб гатавання і скарыстацца спосабам варкі, апісаным вышэй, — за выключэннем салення вады і дадавання ў яе цукру.

Брокалі, залітую вадой, пастаўце на агонь і пачакайце, пакуль вада закіпіць, затым зліце кіпень. У каструлю, у якой яшчэ павінна быць брокалі, наліце ​​​​халодную ваду, дадайце чайную лыжку солі і трохі цукру, а потым варыце да мяккасці.

Смажанне

Нагрэйце сталовую лыжку аліўкавага алею на патэльні на моцным ці сярэднім агні. Дадайце брокалі і дробку солі. Перамяшайце, каб пакрыць капусту алеем.

Гатуйце каля 5 хвілін, часта памешваючы, пакуль брокалі не стане мяккай.

Запяканне і гатаванне на пары

Брокалі лепш запякаць пры тэмпературы 200 градусаў ад 25 да 30 хвілін.

Таксама капусту можна гатаваць на пары з іншай гароднінай. Пасля ачысткі і падзелу на дробныя часткі пакладзіце брокалі ў параварку і варыце каля 10 хвілін. У працэсе можна правяраць відэльцам, ці не гатовая гародніна раней.

Варта таксама ўлічваць, што чым большыя кавалкі брокалі, тым даўжэй яе трэба гатаваць, каб атрымаць патрэбную мяккасць.

Брокалі ў мікрахвалёўцы

Пакладзіце гародніну ў міску, прыдатную для выкарыстання ў мікрахвалёвай печы, і заліце зверху ¼ шклянкі вады. Не дадавайце больш — брокалі трэба гатаваць на пары, а не варыць.

Накрыйце талеркай і пастаўце ў мікрахвалёўку на высокую магутнасць на 3—4 хвіліны. Асцярожна здыміце талерку і праверце, каб брокалі была мяккай. Пры неабходнасці пастаўце ў мікрахвалёўку яшчэ на адну—дзве хвіліны.

Змяшайце прыгатаваную брокалі з невялікай колькасцю аліўкавага алею, соллю і перцам. 

Фота: Einladung_zum_Essen / Pixabay

З чым есці

Брокалі часта можна сустрэць як гарнір да печанай сёмгі і мясных страў, як частку салатаў, запяканак, амлетаў і кішаў.

Таксама гэтая гародніна паўнавартасная і сама па сабе — калі згатаваную брокалі пасыпаць сырам, гэта можа быць карыснай стравай, якую можна ўзяць на працу ў кантэйнеры.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

6
скажыце сыыыр, сееер / Адказаць
25.01.2023
1. Умацоўвае касцявую тканку за кошт высокай канцэнтрацыі кальцыю
2. Не забудзьцеся загадзя прамыць брокалі, каб выдаліць пясок і дробныя часцінкі глебы.
...
а пукцік 1 не супярэчыць пункціку 2? бо дзе па-вашаму кальцый найперш утрымліваеца, га? па логіцы вяшчэй - у глебе. адкуль трапляе ў расліны
ну і далей там па пішчавой цапочцы - да кароў, якія ўвесь час жуюць траву і г.д.

https://nashaniva.com/308352
https://nashaniva.com/308352
https://nashaniva.com/308352

1
Vir / Адказаць
26.01.2023
Nie liubliu brokali, nia smačnaja strava. Jak ni hatuj jaje -  nia smačna. Lieps zvyčajnaj kapusty natusyc`, z cybuļkaju, morkavaj. Dadac` kmienu -  i smačna jasci !
Каб пакінуць каментар, калі ласка, актывуйце JavaScript у наладах свайго браўзеру