Расследавальнікі расказалі, дзе жывуць Пуцін з Кабаевай і як выглядае іх жытло
Пра Пуціна апошнім часам выйшла шмат расследаванняў, у якіх журналісты распавялі пра неабсяжную па памерах, колькасці і коштах маёмасць прэзідэнта Расіі, аформленую на падстаўных асобаў. Але яшчэ не было адказу, дзе жыве Пуцін. Выданне «Праект» упершыню адказала на гэтае пытанне.
Паводле расследавальнікаў, нягледзячы на тое, што Кабаева з’яўляецца ўладальніцай самай вялікай і дарагой кватэры ў Расіі, якая знаходзіцца ў ЖК у Сочы, разам з Пуціным яна жыве далей ад чужых вачэй — у Наўгародскай вобласці на Валдаі.
«Праект» паразмаўляў не менш як з дзесяццю былымі і дзейнымі чыноўнікамі высокага рангу, і ўсе яны прызналіся, што ніколі не бачылі Пуціна і Кабаеву разам не толькі на публічных, але і на закрытых мерапрыемствах і сустрэчах. Буйны бізнесмен, які не раз станавіўся сведкам гарналыжнага адпачынку Пуціна ў Сочы, прызнаецца, што і туды Пуцін ніколі не браў сваю спадарожніцу жыцця. Пры гэтым ніхто з суразмоўцаў «Праекту» не сумняваўся ў наяўнасці сувязі прэзідэнта і былой гімнасткі.
Журналісты знайшлі не толькі месца жыхарства Пуціна і Кабаевай, але і інтэр’еры ўлюбёнай рэзідэнцыі расійскага прэзідэнта, пабудаванай у 2000-х. У 2003 годзе быў гатовы першы варыянт рэзідэнцыі, дызайн быў у стылі хай-тэк, і ён не спадабаўся Пуціну. Той сказаў, што хоча, каб было «як у Пецярбургу».
Працуючы над расследаваннем, «Праект» адшукаў аднаго з кіраўнікоў будаўніцтва валдайскай рэзідэнцыі Пуціна. Ён узводзіў пуцінскую дачу да 2005 года, калі асноўныя працы былі скончаныя. Прадстаўленыя ім фатаграфіі былі верыфікаваныя «Праектам» — яны даюць магчымасць зазірнуць унутр прэзідэнцкага дома, таму што інтэрʼеры адлюстроўваюць уяўленне іх гаспадара аб прыгожым. Там зноў вельмі шмат золата і каштоўных камянёў.
У 2013 годзе Пуцін афіцыйна развёўся з жонкай Людмілай, але Валдай любіць не перастаў, піша «Праект». Менавіта сюды — спачатку, верагодна, у той «залаты» дом — ён прывёў новую выбранніцу. А пазней адбудаваў для Кабаевай і яе дзяцей новы церам — ужо драўляны.
Наваколле пуцінскай і кабаеўскай рэзідэнцый на Валдаі — гэта запаведныя месцы. Большая частка лясоў там ахоўваецца не толькі сіламі ФСА, але і законам — гэта тэрыторыі Валдайскага нацыянальнага парку. Гэта аднак не перашкодзіла распачатай у 2018 годзе вялікай будоўлі проста на землях нацпарка, якія асабліва ахоўваюцца, — там для Пуціна і яго блізкіх вырашылі пабудаваць таемную чыгунку.
За час працы карэспандэнта «Праекта» на Валдаі адразу некалькі мясцовых жыхароў упэўнена паўтарылі: Пуцін для падарожжаў на возера ў апошнія гады карыстаецца індывідуальным браніраваным цягніком, для чаго на падʼездзе да рэзідэнцыі пабудавалі сакрэтную ахоўную станцыю. Нягледзячы на сакрэтнасць, знайсці гэтую станцыю і чыгуначную ветку да яе, як сцвярджаюць журналісты, асаблівай цяжкасці не склала.
На спадарожнікавых здымках расследавальнікі ўбачылі, што на тэрыторыі ў 2016—2020 гадах узвялі дзіцячую пляцоўку, а таксама трасу для картынгу — гэта журналісты лічаць адным з доказаў прысутнасці дзяцей на тэрыторыі дачы Пуціна.
WSJ у мінулым годзе пісаў, што ў Кабаевай і Пуціна — трое сумесных дзяцей. «Праект» інфармацыю пра колькасць і пол меркаваных дзяцей Уладзіміра Пуціна раскрываць не стаў, спаслаўшыся на іх непаўналецце.
Як склаўся лёс хлопца з вядомага жыццесцвярджальнага фота студэнцкага маршу-2020?7
Каментары