Расійскія апазіцыянеры прасілі ЕС зняць санкцыі з уласнікаў «Альфа-груп». Дакументы зліў Венядзіктаў

Шэраг расійскіх апазіцыянераў афіцыйна папрасілі лідараў ЕС выключыць з санкцыйнага спісу мільярдэраў, «якія крытыкуюць вайну ва Украіне». Маюцца на ўвазе Міхаіл Фрыдман, Пётр Авен, Герман Хан і Аляксей Кузьмічоў — уладальнікі карпарацыі «Альфа-груп», якія трапілі пад санкцыі краін Захаду разам з іншымі высокапастаўленымі расіянамі пасля нападу Расіі на Украіну.

Адпаведны ліст з хадайніцтвам быў зліты ў інтэрнэт былым галоўным рэдактарам «Эха Москвы» Аляксеем Венядзіктавым.

Сярод падпісантаў гэтага ліста выявіліся такія расійскія апазіцыйныя дзеячы, як:

• кіраўнік ФБК Леанід Волкаў (адзін з галоўных паплечнікаў Аляксея Навальнага). Пры гэтым у самым пачатку скандалу апазыцыянер заявіў у твітары, што яго подпіс пад зваротам быў туды «дададзены ў фоташопе», а пазней прызнаў факт звароту,
• заснавальніцы тэлеканала «Дождь» Наталля Сіндзеева і Вера Крычэўская,
• палітык Леанід Гозман,
• бізнесовец Яўген Чычваркін,
• эканаміст Уладзіслаў Іназемцаў,
• журналісты Сяргей Пархоменка і Леанід Парфёнаў.

Павялічыць

Акрамя гэтага, Венядзіктаў апублікаваў яшчэ адзін ліст, які быў адпраўлены кіраўніком Фонду барацьбы з карупцыяй Леанідам Волкавым на адрас вярхоўнага прадстаўніка ЕС па замежных справах Жазэпа Барэля. У ім Волкаў прасіў зняць санкцыі з уладальнікаў «Альфа-груп» і іншых расійскіх прадпрымальнікаў, якія «несправядліва трапілі ў чорны спіс».

«Асобна варта пагаварыць пра санкцыі ў дачыненні да так званых «алігархаў», буйных прадпрымальнікаў, якія не ўваходзяць ва расійскі ўрад. Наколькі мы бачым, менавіта яны сталі самымі вялікімі ахвярамі санкцый Еўрасаюза, і гэта ўяўляецца несправядлівым», — пісаў у лісце Волкаў.

У выніку зліваў у расійскіх колах адбыўся сур'ёзны скандал, які прымусіў кіраўніка ФБК «узяць паўзу ў сваёй публічнай дзейнасці». Адпаведную заяву ён апублікаваў 9 сакавіка у сваім тэлеграм-канале.

«У кастрычніку 2022 года я падпісаў і адправіў у офіс Жазэпа Барэля зварот. Гэты ліст быў вялікай палітычнай памылкай. Горш за тое, зрабіўшы гэта, я перавысіў свае паўнамоцтвы — падпісаў яго не ад уласнага імені, а ад усяго ФБК, чым яго і падставіў.

Я думаў, што у той момант склалася ўдалае становішча для запуску ланцуговай рэакцыі і наступнага расколу расейскіх элітаў. Я памыліўся.

Таму я прыняў рашэнне ўзяць паўзу ў сваёй публічнай дзейнасці ў якасці кіраўніка ФБК. Я хачу папрасіць прабачэння ва ўсіх, чый давер не апраўдаў, асабліва ў Аляксея Навальнага, бо гэтую гісторыю будуць на ўсю моц супраць яго раскручваць у Крамлі», — напісаў Волкаў.

Нагадаем, што яшчэ ўлетку 2022 года з'яўляліся звесткі пра тое, што з санкцыйных спісаў ЕС могуць выключыць некаторых расійскіх алігархаў, у тым ліку з некалькіх уладальнікаў «Альфа-груп». 

Многія з гэтых людзей крытыкавалі расійскае ваеннае ўварванне ва Украіну, аднак ніхто з іх адкрыта не выступаў супраць Уладзіміра Пуціна.

42-гадовы Леанід Волкаў кіраваў штабам Навальнага перад прэзідэнцкімі выбарамі 2018 года, да якіх расійскага антыкарупцыйнага блогера не дапусцілі. Ëн быў вымушаны пакінуць Расію ў 2019 годзе, калі супраць яго была заведзеная палітычна матываваная крымінальная справа. Але працягваў кіраваць Фондам барацьбы з карупцыяй, вакол якога гуртаваліся праціўнікі пуцінскага рэжыму.

Расійскія блогеры выказваюць меркаванне, што Венядзіктаў апублікаваў гэтыя дакументы ў адплату за даўно апублікаванае Фондам Навальнага расследаванне яго сувязяў з Крамлём.

«Бура ў расейскай шклянцы вады» — такі загаловак дае свайму артыкул пра гэты скандал Расійская служба Бі-Бі-Сі.

• 5
• 0
• 22
• 36
• 2
• 1
• 4
• 0