«Мразота, свалота, свінота». Z-каналы прызналі, што распаўсюдзілі фэйк, у якім нібыта ўкраінскі вайсковец абражае жанчыну з дзіцем
Учора ў расійскіх прапагандысцкіх каналах завірусілася відэа, у якім украінскія вайскоўцы падразаюць на машыне аўто жанчыны з дзіцем. На кадрах — ваенны шчодра абражае жанчыну, тая моліць аб літасці, дзіця гарлапаніць, ваенны дае аўтаматную чаргу ў бок машыны з цывільнымі.
Сёння прарасійскі тэлеграм-канал «Записки ветерана» прызнаў, што відэа — зроблены расіянамі фэйк. Афіцыйны твітар МЗС Расіі выдаліў ролік са свайго канала. Расследавальнікі мяркуюць, што зняты ролік быў у акупаванай Макееўцы.
На відэа, якое распаўсюдзілася ў расійскіх тэлеграм-каналах, — нібыта здымка з відэарэгістратара аўтамабіля, на якім едзе жанчына з дзіцем.
Іх абганяе машына з украінскім сцягам, з яе выходзяць узброеныя людзі. Адзін з іх называе жанчыну «мразотай» і «свалотай». Пасля таго, як жанчына адказвае ім па-руску, ён патрабуе размаўляць па-ўкраінску і называе яе «свіннёй». У канцы ён адкрывае стральбу — дзіця і жанчына, твараў якіх не відаць, галосяць.
Відэа зʼявілася ў буйных прарасійскіх каналах, у тым ліку Readovka, WarGonzo, канале ваенкара Аляксандра Коца. Ролік апублікаваў таксама афіцыйны твітар МЗС Расіі.
«Аднойчы нацыст — назаўжды нацыст. У такім тэроры жывуць украінцы: паглядзіце, як украінскія вайскоўцы зневажаюць і абстрэльваюць маці з дзіцем на заднім сядзенні, называючы яе «свіннёй» проста за тое, што… яна гаворыць па-руску», — напісаў у публікацыі МЗС.
Сёння адзін з расійскіх каналаў, які апублікаваў гэтае відэа, прызнаў, што яно фэйкавае.
«Нашы крыва практыкуюцца. У правядзенні такіх інфармацыйных аперацый нашым яшчэ вучыцца і вучыцца», — гаворыцца ў пасце.
МЗС РФ выдаліў свой пост з канала.
Карыстальнік PStyle0ne1 ў твітары сцвярджае, што відэа знятае ў расійскім тыле — у раёне горада Макееўка пад Данецкам, акупаваным Расіяй з 2014 года. Гэты аналіз перадрукаваў акаунт GeoConfirmed, які спецыялізуецца на геалакацыі.
Да таго ж, ва Украіне з сакавіка мінулага года забаронена выкарыстанне відэарэгістратараў у аўтамабілях, каб пазбегнуць перадачы інфармацыі аб перамяшчэнні войскаў, звярнуў увагу канал «Агентство. Новости».
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе15
Каментары