У Індыі здарылася жудасная катастрофа на чыгунцы. Загінулі 275 чалавек
Некалькі цягнікоў сутыкнуліся ў штаце Адыша на ўсходзе Індыі. У катастрофе 288 чалавек загінулі, каля 900 атрымалі розныя траўмы.

Па папярэдніх звестках, як піша Бі-бі-сі, хуткі цягнік «Шалімар-Карандэль» каля сёмай вечара па мясцовым часе сышоў з рэек, прычым некалькі вагонаў апынуліся на іншым шляху, па якім ішоў экспрэс «Есвантпур-Хаора». Ён урэзаўся ў гэтыя вагоны, пасля чаго, як паведамляюць індыйскія чыноўнікі, адбылося яшчэ адно сутыкненне, ужо з грузавым цягніком, які стаяў на шляхах. Іншых падрабязнасцяў пакуль не паступала.
Гэта найбуйнейшая чыгуначная катастрофа ў Індыі з 1980-х гадоў. Паводле ацэнак мясцовых уладаў, колькасць ахвяр можа вырасці.
Да месца катастрофы прыбыло ўжо больш за 200 машын хуткай дапамогі, на дзяжурства дадаткова выкліканыя больш за 100 лекараў, многія з тых пасажыраў, хто выжыў, па сведчаннях відавочцаў, прыйшлі на дапамогу тым, хто апынуўся ў перагорнутых вагонах, выратавальная аперацыя працягваецца.
Прэм'ер-міністр Індыі Нарэндра Модзі выказаў спачуванне сваякам загінулых і пацярпелых і паведаміў у твітары, што на месцы аварыі вядуцца выратавальныя працы і робіцца ўсё магчымае, каб пацярпелыя атрымалі патрэбную дапамогу.
Адзін з тых, хто выжыў у сутыкненні цягнікоў, расказаў індыйскаму навінаваму агенцтву ANI, што, калі здарылася аварыя, на яго ўпалі 10-15 чалавек. «Я пашкодзіў руку і шыю. Калі я выбраўся з вагона, я ўбачыў, што хтосьці страціў руку, хтосьці страціў нагу, а ў кагосьці быў знявечаны твар», — сказаў ён.
-
Ва Украіне 14‑гадовая школьніца нарадзіла ад 60‑гадовага мужчыны. Яна кажа, што ён добры бацька, і прасіла не караць яго
-
Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным
-
Урсула фон дэр Ляен назвала фармат, у якім будзе ўдзельнічаць Еўропа ў перамовах па Украіне
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал
Каментары