Жыхарку Жлобіна асудзілі за ўдзел у пратэстах, пазнаўшы па кашулі
У судзе Жлобінскага раёна вынесены прысуд яшчэ адной удзельніцы жнівеньскай акцыі пратэсту 2020 года. 21-гадовую Лаліту Козыраву абвінавацілі ў арганізацыі і падрыхтоўцы дзеянняў, якія груба парушаюць грамадскі парадак, альбо ўдзеле ў іх паводле ч. 1 арт. 342 КК. Справу разглядала суддзя Наталля Качалава, піша «Вясна».
Па матэрыялах абвінавачання, Лаліта нібыта выходзіла на праезную частку, пляскала ў далоні, крычала, выкрыквала лозунгі, адмаўлялася ад выканання патрабаванняў супрацоўнікаў міліцыі.
Згодна з пратаколам агляду прадметаў, былі зафіксаваны характарыстыкі кашулі, канфіскаванай у Козыравай. Пры аглядзе кашулі і супастаўленні яе з відэафайламі камер відэаназірання ўстаноўлена, што менавіта ў ёй яна была ў той вечар на акцыі пратэсту.
Суд пастанавіў прызначыць дзяўчыне абмежаванне волі без накіравання ў папраўчую ўстанову адкрытага тыпу на тэрмін адзін год і шэсць месяцаў.
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве40
Каментары