«Суддзя быў трохі ў шоку». Вярхоўны суд ліквідаваў партыю «Зялёныя»
На пасяджэнні 27 ліпеня Вярхоўны суд задаволіў пазоў Міністэрства юстыцыі і ліквідаваў Беларускую партыю «Зялёныя», паведамляе «Позірк» на падставе сведчання крыніцы ў партыі.
«Гэта быў у нейкай ступені гістарычны працэс, таму што на ім была папка з дакументамі пачынаючы з 1994 года», — адзначыла крыніца «Позірка».
Паводле суразмоўцы, падчас працэсу супрацоўнік Міністэрства юстыцыі без дадатковай просьбы з боку суда нагадаў, што ў 2020 годзе ведамства вынесла партыі папярэджанне пасля падпісання супольнага звароту партый супраць гвалту.
«Прадстаўнікі Мінюста самі гэты дакумент дадалі ў агульную справу. Суддзя быў трохі ў шоку», — распавяла крыніца.
Як адзначыў суразмоўца, у судзе прадстаўнікі партыі спасылаліся на парушэнне працэдуры перарэгістрацыі: прадстаўлены партыяй у Мінюст пакет дакументаў быў зарэгістраваны як зварот грамадзян. У выніку справа не была вынесеная на калегію ведамства, «фактычна адзін чыноўнік прыняў рашэнне пра падачу пазову ў Вярхоўны суд».
Таксама ў партыі звярнулі ўвагу суда на тое, што папраўкі ў закон аб партыях супярэчаць Канстытуцыі:
«Людзі, якія выехалі за межы Беларусі, усё ж застаюцца грамадзянамі краіны, але, згодна са зменамі ў заканадаўстве, партыі фактычна павінны пазбаўляць іх членства».
Вярхоўны суд адхіліў заўвагу партыі, аргументаваўшы гэта тым, што акалічнасці не ўплываюць на колькасць членаў партыі.
Прадстаўнікі партыі таксама звярнулі ўвагу на супярэчнасць патрабавання Міністэрства юстыцыі прадстаўляць спіс членаў партыі закону «Аб абароне персанальных даных».
У сваю чаргу, прадстаўнік Мінюста заявіў аб неадпаведнасці колькасці членаў «Зялёных» мінімальна неабходнай (5 тысяч замест 1 тысячы пасля ўнясення зменаў у заканадаўства).
Цяпер чытаюць
«Праца прапагандыстаў наўрад ці чысцейшая за нашу». Экс-палітвязні адкрылі ў Варшаве свой клінінг — як пайшло?2
«Праца прапагандыстаў наўрад ці чысцейшая за нашу». Экс-палітвязні адкрылі ў Варшаве свой клінінг — як пайшло?
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1818
Каментары