У Таліне затрымалі мужчыну, які закідаў яйкамі расійскае пасольства. Імаверна, гэта журналіст Бабчанка
У ноч на 30 ліпеня паліцыя Таліна затрымала мужчыну, які кінуў яйкі ў сцяну пасольства Расіі, піша Delfi са спасылкай на праваахоўнікаў. У паведамленні прэс-службы паліцыі гаворыцца, што мужчыну затрымаў патруль, супраць яго распачатая справа, аднак не ўдакладняецца, якая.
Імя затрыманага ў паведамленні не называецца, аднак удакладняецца, што ён 1977 года нараджэння. Расійскі актывіст Міхаіл Баранаў (4 чэрвеня ён выходзіў падчас акцыі ў падтрымку Аляксея Навальнага ў Вільні з плакатам «Навальністы — латэнтныя рашысты») паведаміў, што затрыманы — журналіст Аркадзь Бабчанка.
Сам Бабчанка ўвечары 30 ліпеня апублікаваў сваё фота ў паліцэйскай машыне і подпіс: «Эстонскія чайкі ляцяць над нашай зонай… а ў турме цяпер вячэра. Добрай ночы. Вечар у хату».
З Расіі Бабчанка з'ехаў у 2017 годзе і жыў ва Украіне. У маі 2018 года Служба бяспекі Украіны правяла спецыяльную аперацыю, абвясціўшы пра забойства журналіста. На наступны дзень ён з'явіўся на прэс-канферэнцыі і распавёў, што гэта была інсцэніроўка для таго, каб раскрыць замах на яго, у якім СБУ абвінаваціла расійскія спецслужбы.
У 2019 годзе Бабчанка пакінуў Украіну праз нязгоду з уладамі, паабяцаўшы вярнуцца на танку M1 Abrams. Апошнім часам Бабчанка, мяркуючы па інфармацыі ў ягоных сацсетках, жыве ў Эстоніі.
У студзені 2023 года МУС Расіі абвясціла Бабчанку ў вышук, а ў красавіку расійскі Мінюст унёс яго ў рэестр «замежных агентаў», нагадвае «Дождь».
Цяпер чытаюць
Яўген Дудкін: Я быў сакрэтным супрацоўнікам КДБ. Але толькі да 2016 года17
Каментары