Новы ўладальнік не зможа выкарыстоўваць брэнд EPAM у Расіі.
Распрацоўшчык праграмнага забеспячэння EPAM прадаў расійскую юрыдычную асобу «ЭПАМ Сістэмз» расійскай групе «Рэксофт». Здзелка адбылася 2 жніўня, як паведамляе агенцтва «Інтерфакс».
«Рэксофт» паведаміў, што група набыла 100% кампаніі RNT Group, якая з'яўляецца праваўладальнікам ТАА «ЭПАМ Сістэмз» — «дачкі» EPAM Systems Inc. у Расіі.
Як паведамілі «Інтерфаксу» ў «Рэксофце», паводле ўмоў пагаднення з EPAM Systems Inc. кампанія не можа выкарыстоўваць брэнд EPAM у Расіі.
«З улікам планаванага з'яўлення новага брэнда аб'яднанага праекта і часу на інтэграцыю камандаў было прынята рашэнне аб працы ў гэты перыяд пад брэндам RNT Group», — сказалі ў кампаніі.
У паведамленні таксама ўдакладняецца, што ўмовы здзелкі не ўтрымліваюць апцыёну на зваротны выкуп. Плануецца, што асноўныя крокі па аб'яднанні зоймуць каля года. Сума здзелкі не называецца.
EPAM Systems Inc., распрацоўшчык заказнога праграмнага забеспячэння, быў заснаваны ў 1993 годзе. У красавіку 2022 года кампанія паведаміла пра намер спыніць працу ў Расіі на фоне вайны ва Украіне. Расійская юрасоба кампаніі была зарэгістраваная ў 2001 годзе. У 2022 годзе кампанія скараціла выручку на 47,6% — да 15 млрд расійскіх рублёў. Кампанія атрымала чыстую страту памерам 3 млрд рублёў супраць прыбытку 5,5 млрд рублёў у 2021 годзе.
«Рэксофт» — адзін з вядучых расійскіх распрацоўшчыкаў лічбавых рашэнняў для такіх сфер, як банкі і фінансы, дзяржсектар, рэтэйл, транспарт, лагістыка, IT, тэлекам, медыя, гасцінічны бізнэс.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары