Двух палітвязняў адправілі ў калонію за тры сарваныя сцягі, аднаго з іх ужо другі раз
Суд Камянецкага раёна 1 жніўня асудзіў двух палітзняволеных да пазбаўлення волі за тры сарваныя сцягі. Паводле арт. 370 Крымінальнага кодэкса (здзек з дзяржаўных сімвалаў) 18-гадоваму Захару Сінякову прызначылі паўтара года калоніі ва ўмовах агульнага рэжыму, а 19-гадоваму Елісею Кузняцову, які цалкам адбыў тэрмін па іншай крымінальнай справе, — два з паловай гады. Такі прысуд вынесла суддзя Галіна Прыхожка, піша «Берасцейская вясна».
Паводле версіі абвінавачання, у ноч з 14 на 15 мая 2023 года ў аграгарадку Войская (Камянецкі раён Брэсцкай вобласці) хлопцы нібыта сарвалі тры дзяржаўныя сцягі з установы адукацыі, гандлёвага аб’екта і аддзялення пошты.
Для Елісея Кузняцова гэта ўжо другая палітычная крымінальная справа з 2020 года: першы раз яго судзілі за нібыта кінуты кактэйль Молатава. 17 снежня 2022 года Елісей цалкам адбыў тэрмін у наваполацкай калоніі № 1 і выйшаў на волю.
23 мая стала вядома, што Елісея паказальна ўзялі пад варту ў Высокаўскім аграрным каледжы.
Каментары