Начная атака па Адэскай вобласці: Паветраныя сілы Украіны збілі 22 з 25 «Шахедаў»
У ноч на 3 верасня расейцы атакавалі 25 ударнымі беспілотнікамі «Шахед» поўдзень Адэскай вобласці. Паветраныя сілы збілі 22 БПЛА. Ёсць траплянні ў прыпартовую інфраструктуру, пацярпелі двое цывільных, паведамляе прэс-служба Паветраных сіл.
«У ноч на 3 верасня 2023 года расійскія акупанты здзейснілі некалькі хваляў нападаў ударнымі БПЛА «Shahed-136/131» з паўднёвага і паўднёва-ўсходняга кірунку (мыс Чаўда, Крым, і Прыморска-Ахтарск, РФ)».
Паведамляецца, што ўсяго былі зафіксаваны пускі 25 ударных БПЛА «Shahed-136/131», якія атакавалі паўднёвыя раёны Адэскай вобласці.
22 БПЛА ўкраінскія вайскоўцы знішчылі.
Паветраныя сілы не ўдакладняюць, куды трапілі тры нязбітыя дроны.
Расія наносіць удары па Адэсе і Адэскай вобласці з сярэдзіны ліпеня пасля выхаду са збожжавай здзелкі. Украінскія ўлады называлі іх мэтай партовую інфраструктуру і збожжасховішчы.
Каментары