МЗС: Пасольствы і консульствы больш не будуць выдаваць пашпарты і ID-карты, але ранейшыя звароты будуць разгледжаныя
Прэс-служба Міністэрства замежных спраў пракаментавала ўступленне ў сілу Указа Лукашэнкі «Аб парадку выдачы дакументаў і здзяйснення дзеянняў», апублікаванага сёння на Нацыянальным прававым партале. Згодна з ім цяпер, каб абмяняць або працягнуць пашпарт за мяжой, трэба рабіць гэта ў Беларусі.
«Пасольствы і консульствы будуць па-ранейшаму займацца пытаннямі грамадзянства, консульскага ўліку, рэгістрацыяй актаў грамадзянскага стану, афармленнем пастаяннага пражывання па-за межамі Беларусі. Дыпламатычныя місіі будуць і далей выдаваць пасведчанні на вяртанне ў Рэспубліку Беларусь, завяраць тастаменты, згоды, адмовы, вернасць копій і сапраўднасць подпісу на дакументах», — гаворыцца ў паведамленні МЗС.
Разам з тым беларускія замежныя ўстановы больш не ўпаўнаважаныя займацца пытаннямі выдачы/абмену/прадаўжэння ўсіх відаў пашпартоў і ідэнтыфікацыйных карт. Названыя дзеянні можна ажыццявіць на тэрыторыі Беларусі.
Што рабіць у такім выпадку?
МЗС рэкамендуе, каб грамадзяне, якія аформілі пастаяннае пражыванне па-за межамі Рэспублікі Беларусь і знаходзяцца ў замежных установах на пастаянным консульскім уліку, звярталіся па пытаннях абмену пашпартоў у галоўнае консульскае ўпраўленне МЗС або ў падраздзяленне па грамадзянстве і міграцыі Упраўлення ўнутраных спраў па месцы апошняй рэгістрацыі ў Рэспубліцы Беларусь (па месцы апошняга жыхарства бацькоў — для асоб, якія не пражывалі ў Беларусі).
Грамадзяне, зарэгістраваныя ў Беларусі, змогуць атрымаць/ абмяняць/прадоўжыць пашпарт па звычайнай для ўсіх грамадзян Беларусі працэдуры ў падраздзяленні па грамадзянстве і міграцыі УУС па месцы рэгістрацыі ў Рэспубліцы Беларусь.
Апастыль таксама будзе прастаўляцца ў адным з кампетэнтных органаў у Беларусі (МЗС, Мінадукацыі, Мінюсце і галоўным упраўленні юстыцыі Мінгарвыканкама і аблвыканкамаў — у залежнасці ад тыпу дакумента).
Падача дакументаў для прастаўлення апастыля магчымая толькі асабіста ўладальнікам дакумента альбо іншай асобай пры прад'яўленні даверанасці, аформленай у Рэспубліцы Беларусь.
Асабістая падача дакументаў у зацікаўлены орган таксама прадугледжана і па шэрагу іншых адміністрацыйных працэдур, пералічаных у адпаведным дадатку да ўказа (для атрымання даведак ЗАГС, паўторных пасведчання аб рэгістрацыі актаў грамадзянскага стану (акрамя смерці) і інш.).
Таксама прэс-служба беларускага замежнапалітычнага ведамства падкрэслівае, што звароты, пададзеныя грамадзянамі да ўступлення ў сілу ўказа разглядаюцца ў парадку, які дзейнічаў да яго ўступлення ў сілу.
Чытайце таксама:
Апублікавалі ўказ Лукашэнкі аб замене пашпартоў за мяжой. Ён пачне дзейнічаць сёння ноччу
«Мы працуем, каб беларусы не засталіся без пашпартоў» — Ціханоўская
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары