«Пабіў і правільна зрабіў». Рамзан Кадыраў апублікаваў ролік, у якім ягоны сын жорстка збівае чалавека
У тэлеграм-канале кіраўніка Чачні Рамзана Кадырава з'явіўся ролік, на якім ягоны сын Адам жорстка збівае іншага мужчыну. Сцвярджаецца, што гэта Мікіта Журавель, абвінавачаны ў публічным спаленні Карана. Ролік гэты хадзіў па сеціве і раней, але ўзнікалі спрэчкі аб ягонай сапраўднасці і адносна таго, што на ім сапраўды Адам Кадыраў з Жураўлём. Цяпер Рамзан Кадыраў гэта пацвердзіў і цалкам стаў на бок сына.
«Пабіў і правільна зрабіў. Больш за тое, я лічу, што той, хто паквапіўся на любое Святое Пісанне, у тым ліку дэманстратыўна спальвае яго, абразіў гэтым дзясяткі мільёнаў грамадзян нашай вялікай краіны, павінен панесці суровае пакаранне», — сцвярджае аўтарытарны чачэнскі кіраўнік.
Пасля чаго пераходзіць да маралізатарства: маўляў,
«нізкія ўчынкі замаху на святое ўласцівыя толькі людзям цынічным, амаральным, бесхрыбетным і прадажным, ахвотным унесці разлад у грамадства, якое наша дзяржава гадуе ў ідэалах талерантнасці, памяркоўнасці і любові адно да аднаго».
А «гэтыя мярзотнікі не разумеюць мовы пераканання, не хочуць будаваць дзяржаву, развіваць яе… Такія правакатары і здраднікі — хворая пухліна на целе, якую трэба выпальваць», — пагражае Рамзан Кадыраў і дадае, што ганарыцца ўчынкам сына і «паважае яго выбар».
Сам Рамзан Кадыраў у кадры не з'яўляецца, усё гэта выкладаецца ў тэкставай версіі. Што толькі дадае вагі чуткам, што ў чачэнскага дыктатара вельмі кепска са здароўем, дзеля чаго ён не хоча ці не можа паказвацца на публіцы.
Мікіту Жураўля затрымалі вясной у Валгаградзе пасля акцыі са спаленнем Карана каля мячэці. Як сцвярджае Следчы камітэт Расіі, мужчына прызнаўся, што нібыта зрабіў гэта за грошы па ўказанні ўкраінскіх спецслужбаў. Пазней Жураўля даставілі ў Чачню.
Цяпер чытаюць
Ад БНФ да ГРУ. Хто такая Наталля Судлянкова, якой чэхі загадалі пакінуць краіну27
Каментары