Мінадукацыі вызначылася з цэнтралізаванымі іспытамі. Гэтым разам іх правядуць не ў выходныя
Выпускнікоў да цэнтралізаванага іспыту сталі рыхтаваць па-новаму — з улікам памылак мінулага навучальнага года і ўпершыню праведзенага ЦЭ. Пра гэта заявіў старшыня камітэта адукацыі Мінгарвыканкама Андрэй Стрыгельскі на прэс-канферэнцыі, піша Tochka.by.
«Вызначаны тыя модулі, тыя тэмы, па якіх варта было папрацаваць больш сур'ёзна і прадметна. І на працягу навучальнага года нашы настаўнікі працуюць над тым, каб дзеці былі цалкам гатовыя да правядзення ЦЭ», — заявіў Стрыгельскі.
Яшчэ адна навіна — троху зрушаныя і разведзеныя даты экзаменаў, праводзіцца яны будуць у будныя дні. Нагадаем, тэрміны правядзення ЦЭ вызначаны былі яшчэ ў верасні.
Пасля 11 класа выпускнікі будуць здаваць два ЦЭ:
адзін па прадмеце на выбар: 27 мая (панядзелак), рэзервовыя дні — у даты правядзення ЦТ у рэзервовыя дні,
руская або беларуская мова (на выбар): 30 мая (чацвер), рэзервовыя дні — у дні правядзення ЦТ у рэзервовыя дні.
Першы цэнтралізаваны іспыт і праца над памылкамі
Нагадаем, сёлета школьнікі здавалі па-новаму экзамены і ЦТ: з'явіліся два ЦЭ (замест школьных экзаменаў, з вынікамі якіх абітурыенты потым паступалі ў ВНУ) і засталося толькі адно замест трох ЦТ.
Адразу ж пасля абвяшчэння першых вынікаў разгарэўся скандал: першыя вынікі выклікалі шквал незадаволенасці бацькоў і выпускнікоў — балы выявіліся ніжэйшымі за чаканыя. А ўсё праз складаную сістэму падліку. Мінадукацыі спачатку заявіла, што ніякага пераліку не будзе, але пасля шуміхі ў выпускнікоў усё ж з'явіліся новыя вынікі ЦЭ.
Акрамя таго, і бацькі, і настаўнікі адзначалі не вельмі зручныя даты для здачы экзаменаў і маленькія прамежкі паміж іспытамі. Мінадукацыі ж паабяцала чарговыя навіны для выпускнікоў 2024 года. Тэрміны здачы ЦЭ могуць змяніцца, таксама, магчыма, будзе новая сістэма ацэньвання.
Акрамя таго, РІКВ анансаваў чарговыя змены ў ЦТ і ЦЭ: магчыма, зноў вернуць заданні пятага ўзроўню складанасці.
На адной з нарад па выніках уступнай кампаніі Аляксандр Лукашэнка зноў запатрабаваў вызначыцца з сістэмай паступлення і з тым, па якіх правілах яно будзе праходзіць у наступным годзе. А потым запатрабаваў яшчэ раз, напярэдадні верасня, спыніць «усякія вакханаліі» ў адукацыі і нарэшце вызначыцца з сістэмай паступлення ў ВНУ.
Цяпер чытаюць
Хто тая Аліна, з якой Лукашэнка танцаваў гэтым разам на навагоднім балі18
Каментары