«Хацела адзначыць юбілей з сям'ёй». Што вядома пра Аляксандру Каско, якой прысудзілі 10 гадоў пасля вяртання ў Беларусь
Пра затрыманне Аляксандры Каско стала вядома ў лютым 2023 года. Тады яна вырашыла вярнуцца дадому з Польшчы і на наступны дзень была затрыманая.
Аляксандры Каско 30 гадоў. Родам яна з Ружанаў. Гэта мястэчка ў Пружанскім раёне Брэсцкай вобласці. Пасля дзяўчына перабралася ў Ваўкавыск. Адвучылася на медсястру, працавала ў паліклініцы.
Вось як апісвае яе сяброўка:
«Аляксандра, ці проста Санька — гэта чалавечышча з вялізнай літары. Спагадлівая, чулая, заўсёды гатовая дапамагчы. Звычайная дзяўчына са звычайнага горада, але з вялізным пачуццём сумленнасці і справядлівасці».
Вядома, што ў 2020-м яна ўдзельнічала ў руху за свабодныя выбары — гэта яна распавядала ў інтэрв'ю «Белсату». Сябры дзяўчыны расказалі пра тое, што было пасля:
«Каля дзесяці затрыманняў, суткі, ІЧУ і допыты. Праз пагрозы і ціск галоўнага доктара яе звольнілі з паліклінікі, а ў горадзе на яе літаральна палявалі сілавікі. Таму ў 2021-м яна з'ехала з краіны.
Яе затрымалі на наступны дзень пасля вяртання, калі яна ўжо была ў бацькоў, аднялі тэхніку. Мне яна казала, што паехала рабіць візу. Але іншай сяброўцы прызналася, што хацела адзначыць 30-годдзе з сям'ёй».
Спачатку дзяўчыне далі 10 сутак арышту за «распаўсюд экстрэмісцкіх матэрыялаў. Але на волю яна не выйшла. Ёй закідалі артыкул 361-4, «судзейнічанне экстрэмісцкай дзейнасці». Пасля дадаліся яшчэ сем артыкулаў, сярод якіх «распальванне варожасці ці варажнечы» і «стварэнне экстрэмісцкага фармавання».
На праўладных каналах выйшаў фільм, дзе дзяўчыне закідалі супрацоўніцтва з валанцёрскімі арганізацыямі ды адміністраванне тэлеграм-каналаў. Гэтае ж абвінавачанне паўтарыў у сваім рэлізе і Следчы камітэт.
Сёння над дзяўчынай скончыўся суд, на якім ёй прысудзілі дзесяць гадоў пазбаўлення волі.
«У турме яна не маркоціцца і будуе планы на будучыню, падтрымлівае іншых зняволеных і перадае прывітанні ўсім, хто не маўчыць», — кажа сябра дзяўчыны.
«Наша Нiва» — бастыён беларушчыны
ПАДТРЫМАЦЬ
Цяпер чытаюць
Памятаеце пару студэнткі і выкладчыка, дзе ён старэйшы на 31 год? Аказваецца, ён быў святаром, а яна вучылася на рэгентку9
Каментары