У Нью-Ёрку пад штаб-кватэрай мясцовых хасідаў знайшлі патаемны тунэль
У ЗША група хасідаў уступіла ў сутычку з паліцыяй праз спробу ўладаў заліць бетонам тунэль, незаконна выкапаны пад штаб-кватэрай руху Хабад-Любавіч у Брукліне. Пра гэта паведамляе «Медуза» на падставе публікацый амерыканскай прэсы.
Дзевяць чалавек ва ўзросце ад 19 да 21 года былі арыштаваныя. Ім выставілі абвінавачванні ў незаконным пранікненні, прычыненні шкоды ўласнасці і перашкодзе працы ўрадавых службаў.
На відэазапісах, знятых відавочцамі, відаць, як паліцыянты ўступаюць у канфлікт з маладымі людзьмі, якія сядзяць у выдзеўбаным унутры цаглянай сцяны праёме, верагодна, такім чынам спрабуючы перашкодзіць заліць яго бетонам. Актывісты штурхалі супрацоўнікаў паліцыі і кідалі ў іх дошкі, у адказ адзін з афіцэраў распыліў слёзатачывы спрэй.
Тунэль пад цэнтрам быў знойдзены некалькі тыдняў таму. Як піша таблоід The New York Post, яго капалі на працягу амаль года; уладам пра яго стала вядома пасля таго, як жыхары суседніх дамоў паведамілі аб падазроных шумах, якія даносяцца з падвала.
Тунэль вышынёй каля метра і даўжынёй каля 15 метраў злучаў штаб-кватэру руху, дзе знаходзіцца сінагога, з невялікім суседнім будынкам, дзе раней размяшчалася міква — памяшканне для рытуальнага абмывання.
Як нагадвае The New York Times, хасідская грамада сутыкнулася з унутранымі рознагалоссямі пасля смерці ў 1994 годзе апошняга рэбэ Менахема-Мендла Шнэерсона. Невялікая частка паслядоўнікаў руху лічыць яго Месіяй і не прызнае ягонай фізічнай смерці.
Тунэль, мяркуючы па ўсім, выкапалі прадстаўнікі месіянскай фракцыі — верагодна, яны лічылі, што такім чынам выконваюць волю рэбе аб пашырэнні тэрыторыі сінагогі.
Яшчэ адзін прадстаўнік руху заявіў журналістам, што члены грамады былі расчараваныя бяздзейнасцю яе лідараў па пытанні аб пашырэнні будынка, якое было неабходна для вырашэння праблемы збору людзей падчас набажэнстваў, і такім чынам вырашылі «ўзяць справу ў свае рукі».
Афіцыйна ў руху Хабад-Любавіч назвалі факт будаўніцтва тунэлю «вандалізмам групы маладых экстрэмістаў» і падзякавалі паліцыі Нью-Ёрка «за прафесіяналізм і чуйнасць». Штаб-кватэру Хабад-Любавіч часова закрылі для праверкі структурнай цэласнасці будынка.
Пасадзілі адваката Дзмітрыя Лаеўскага, які абараняў Бабарыку і Знака10
Пасадзілі адваката Дзмітрыя Лаеўскага, які абараняў Бабарыку і Знака
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5151
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам51
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі4646
Каментары