Стаў вядомы прысуд 67-гадовай Галіне Краснянскай, што вярнулася са Швецыі ў Беларусь
Галіну Краснянскую асудзілі згодна з артыкулам 361-3 (фінансаванне экстрэмісцкай дзейнасці).
12 студзеня сяброўку арганізацыі «Беларусы Швецыі» Галіну Краснянскую асудзілі на пяць гадоў пазбаўлення волі згодна з артыкулам 361-3 (фінансаванне экстрэмісцкай дзейнасці).
«Мы будзем працягваць падтрымліваць Галіну і яе сям’ю: заява праўлення «Беларусаў Швецыі». Мы абураныя несправядлівым прысудам у дачыненні да Галіны. З вытокаў нашай арганізацыі Галіна займалася развіццём беларускай культуры, ахвяравала частку сябе на развіццё супольнасці беларусаў у Швецыі, ладзіла тэатральныя гурткі. Галіна — адданая, шчырая беларуска, якая праз гады захоўвала моцную сувязь з беларускай культурай. Мы будзем працягваць падтрымліваць Галіну і яе сям’ю», — гаворыцца ў заяве праўлення «Беларусаў Швецыі».
Невядома, калі жанчына вярнулася ў Беларусь, але не раней за вясну 2023-га года. Апошняе абнаўленне ў яе фэйсбуку датуецца сакавіком, але апошнія фота са Швецыі — канцом 2022-га.
Дата затрымання невядомая таксама, але вінавацяць яе па другой частцы артыкула 361-3 Крымінальнага кодэкса. Па звестках «Вясны», звычайна гэта азначае ахвяраванне беларускім добраахвотнікам або на дапамогу Украіне. Жанчыне пагражала ад пяці да дзесяці гадоў турмы — іншага пакарання па артыкуле не прадугледжана.
Суд над Галінай Краснянскай пачаўся сёння ў Мінскім гарадскім судзе.
Цяпер чытаюць
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні3
Каментары