Беларускі гадзіннік з касмічным дызайнам атрымаў прэстыжную прэмію
Дызайн наручных гадзіннікаў ад беларускага брэнда Hvilina атрымаў прэстыжную прэмію ў галіне дызайну прадуктаў-iF DESIGN AWARD 2024. Гэта ўжо 7-я міжнародная ўзнагарода для брэнда, піша CityDog.io.
iF DESIGN AWARD — адна з найважнейшых дызайнерскіх прэмій у галіне, яна ўручаецца найстарэйшым у свеце незалежным інстытутам дызайну iF International Forum Design GmbH (Гановер, Германія).
У гэтым годзе разам з Hvilina ў намінацыі ўдзельнічалі такія брэнды, як Apple, Seiko, Casio і інш.
Калекцыя наручных гадзіннікаў Universum Mechanical, натхнёная рамантызмам касмічных падарожжаў і прагрэсам у засваенні чалавекам космасу, уганаравалася прэміяй у катэгорыі Product — Watches/Jewelry. Дызайн збудаваны на канцэпцыі зліцця стылізацый дзвюх зорных картаў — старажытнай і сучаснай.
На цыферблаце ёсць два кольцы для індыкацыі часу (знешняе і ўнутранае), а таксама каляндар.
Гадзіннік з калекцыі можна замовіць на сайце брэнда, яго кошт — 450 еўра.
Каментары