«Капітуляцыя — гэта не мір». Генеральны сакратар НАТА заклікаў працягваць дапамагаць Украіне
Генеральны сакратар НАТА Енс Столтэнберг, выступаючы на прэс-канферэнцыі ў Бруселі, выказаўся адносна таго, ці трэба Украіне цяпер пачынаць перамовы з Расіяй.
«Капітуляцыя — гэта не мір. Прэзідэнт Расіі Уладзімір Пуцін пачаў гэтую вайну і можа скончыць яе сёння. Украіна не мае такой магчымасці», — сказаў Столтэнберг.
Таксама ён выступіў з заклікам да ўсіх саюзнікаў працягваць аказваць Украіне вайсковую падтрымку.
«Мы павінны працягваць умацоўваць Украіну, каб паказаць прэзідэнту Пуціну, што ён не атрымае жаданага на полі бою. Мы павінны сесці і дамовіцца пра рашэнне, пры якім Украіна будзе прызнаная як незалежная краіна», — заявіў Столтэнберг.
Некаторыя ўкраінскія СМІ бачаць у гэтай заяве адказ Папу Рымскаму Францішку, які напярэдадні заклікаў Кіеў «весці перамовы, пакуль сітуацыя не пагоршылася».
Выступ Францішка ўжо выклікаў хвалю крытыкі на Захадзе. Сярод палітыкаў, якія асудзілі яго выказванне, была, напрыклад, міністарка замежных спраў Германіі Аналена Бербак. «Я думаю, некаторыя рэчы можна зразумець, толькі калі ўбачыць іх на ўласныя вочы», — сказала яна. І дадала, што калі Украіна і яе саюзнікі «не праявяць сілу цяпер, міру не будзе».
Рэспекты ад дактароў і спецыфіка ў войску. Прынцыпова беларускамоўны юнак расказаў, як ён адслужыў7
Каментары