Праваслаўнага святара з Пінска забралі ў войска, ён служыць у дэсанце
Клірыка праваслаўнага храма Святых Пятра і Фяўронні ў Пінску іерэя Арцемія Мігалевіча адправілі служыць у войска ў той жа самы час, калі хацелі прызваць і каталіцкага святара, заўважыў Katolik.life.
Як высветлілася, першых святароў адправілі служыць у армію яшчэ падчас вясновага прызыву ў 2023 годзе — калі спрабавалі прызваць і вікарыя каталіцкай парафіі ў Навагрудку Дзмітрыя Мальца. Ён тады прыбыў у ваенкамат дзеля адпраўкі ў войска, але адтуль святара накіравалі на медабследаванне, якое ён не прайшоў.
Як гаворыцца ў паведамленні, апублікаваным пінскім праваслаўным прыходам, ягоны клірык нясе тэрміновую вайсковую службу ўжо 10-ы месяц — гэта значыць, быў адпраўлены ў войска ў траўні 2023-га.
Акурат у той час з'явілася інфармацыя аб рашэнні ўладаў пачаць прызываць на тэрміновую вайсковую службу святароў, аднак меркавалася, што яны будуць праходзіць яе ў транспартных войсках, улічваючы немагчымасць святарам браць у рукі зброю. Але ў выпадку з пінскім святаром гэта аказалася не так — яго адправілі ў паветрана-дэсантныя войскі ў в/ч 92616 у Брэсце.
12 сакавіка група прадстаўнікоў 38-й асобнай гвардзейскай дэсантна-штурмавой брыгады, дзе служыць клірык, наведала пінскі храм. Гэта быў візіт у адказ, бо да таго царкоўнікі наведалі вайскоўцаў на іх тэрыторыі.
Арцемій Мігалевіч родам з Лунінца, раней граў у аркестры. На здымку ён у вайсковай форме, у акулярах.
Цяпер у Беларусі праходзіць новая прызыўная кампанія. Адносна прызыву святароў вясной 2024 года — як каталіцкіх, так і праваслаўных — публічнай інфармацыі пакуль няма.
Цяпер чытаюць
«Прыгразіла пайсці да іншага». У МУС расказалі падрабязнасці забойства 43‑гадовай цяжарнай жанчыны хакейным арбітрам16
Каментары