Землятрус выклікаў у глыбіні вострава велізарныя апоўзні.
Ля ўсходняга ўзбярэжжа Тайваня адбыўся землятрус магнітудай 7,4. На востраве і ў суседніх краінах выпусцілі папярэджанне наконт цунамі, піша Бі-бі-сі.
Эпіцэнтр, па звестках Геалагічнай службы ЗША, знаходзіўся за 18 км на поўдзень ад горада Хуалянь. Са слоў сейсмолагаў, гэта самы магутны землятрус на Тайвані за 25 гадоў.
У Японіі і на Філіпінах неўзабаве пасля землятрусу было абвешчана папярэджанне аб цунамі. Японскае метэаралагічнае агенцтва пазней знізіла ўзровень папярэджання, аднак усё ж паказала, што афтэршокі такой магутнасці могуць працягвацца яшчэ да тыдня і насельніцтву варта захоўваць пільнасць.
Кітайскія дзяржаўныя СМІ паведамілі, што падземныя штуршкі таксама адчуваліся ў мацерыковай правінцыі Фуцзянь на паўднёвым усходзе краіны.
«Землятрус пачаўся блізка да сушы, на малой глыбіні. Ён адчуваўся на ўсім Тайвані і суседніх астравах. Ён самы моцны за 25 гадоў», — заявіў кіраўнік Тайбэйскага цэнтра сейсмалогіі.
Буйны тайваньскі вытворца паўправаднікоў TSMC паведаміў, што эвакуяваў супрацоўнікаў з некалькіх сваіх фабрык у Сіньчжу і на поўдні вострава, аднак сістэмы бяспекі працуюць нармальна. TSMC вырабляе чыпы для такіх кампаній, як Apple і Nvidia.
У глыбіні вострава рэльеф вельмі гарысты. Мяркуючы па кадрах у сацсетках, землятрус выклікаў там велізарныя апоўзні. Аднак маштаб наступстваў пакуль невядомы.
Тайваньскія СМІ паказваюць будынкі, якія абрынуліся, і эвакуацыю людзей са школ і жылых дамоў.
Паводле апошніх звестак, чатыры чалавекі загінулі і 97 пацярпелі, пішуць мясцовыя СМІ.
Цяпер чытаюць
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе99
Каментары