Шрайбман адказаў Кныровічу: Як пры такім падыходзе можна лічыць сябе беларускім палітыкам?
У новым выпуску ютуб-канала «Мне таксама не падабаецца» блогер і прадпрымальнік Аляксандр Кныровіч зрабіў рэзанансную заяву: ён за тое, каб «беларусы мелі магчымасць ездзіць у «Акропаліс», але яму «не шкада людзей, якія стаяць на мяжы, зусім не шкада». Арцём Шрайбман адрэагаваў на гэта.
Шрайбман узгадвае, што ён нядаўна казаў пра крызіс ідэнтычнасці беларускіх дэмсілаў, што ўжо не заўсёды і не ўсім зразумела, каго яны прадстаўляюць і за чые інтарэсы змагаюцца.
«І тут Аляксандр Кныровіч бліскуча праілюстраваў, што я меў на ўвазе», — піша ён.
Шрайбман дадае, што паколькі Аляксандр — адзін з лідараў аднаго са спісаў на выбарах у Каардынацыйную раду, то яго можна называць палітыкам, «нават нягледзячы на такі наватарскі падыход да барацьбы за галасы выбаршчыкаў».
«Гэты выпуск «Мне таксама не падабаецца» быў цікавым з пункту гледжання розных вектараў эмпатыі ўдзельнікаў праграмы. У кагосьці больш эмпатыі да беларуса, які стаіць на мяжы ў сутачнай чарзе, каб, напрыклад, убачыць сваіх дзяцей і ўнукаў, якія не могуць вярнуцца ў краіну, або выдыхнуць ад змроку ўнутры краіны, ці нават проста павандраваць.
І пазіцыя такога беларуса — праз чаргу рацыяналізуецца, бярэцца як пункт адліку, як легітымны інтарэс, за права на рэалізацыю якога беларускі палітык у эміграцыі павінен змагацца.
У кагосьці больш эмпатыі да еўрапейскага бюракрата або польскага консула. Менавіта ў іх становішча хочацца ўвайсці, яны становяцца «сваім бокам», іх дзеянні або бяздзейнасць трэба рацыяналізаваць.
Гэта значыць геапалітычны кантэкст, агульны падыход да ўсіх беларусаў і ўсякія службовыя абмежаванні з жыцця еўрапейскага чыноўніка становяцца тым пунктам адліку, зыходзячы з якога хочацца растлумачыць новую рэальнасць беларусам унутры краіны, якія ўсё ніяк гэтую рэальнасць не зразумеюць, і якіх, адпаведна, не шкада, якія павінны пацярпець, раз ужо апынуліся па той бок рова.
Разумець, улічваць і ўмець растлумачыць абедзве гэтыя пазіцыі — нармальна, і нават неабходна. Накіроўваць сваю эмпатыю ў бок ад беларусаў, а не да беларусаў — таксама натуральна для нейкай часткі эмігрантаў. Складана шмат гадоў асацыяваць сябе з тымі, хто далёка, а не з тымі, хто блізка.
Але працягваць пры такім падыходзе лічыць і пазіцыянаваць сябе беларускім палітыкам, гэта значыць выразнікам інтарэсаў хоць нейкай значнай колькасці беларусаў — вось што ўражвае маё ўяўленне», — піша Шрайбман.
@nashanivanews Беларусы стаяць у катастрафічных чэргах на мяжы #брест #граница #очередь #беларусь #беларускаямова #беларусьновости #белорусывпольше #белорусы ♬ DESTRUCTION - SCXR SOUL & NONTHENSE
Цяпер чытаюць
«Ты ў нас у Беларусі!» — «Я маму тваю я*аў». Госцю з Алтая не спадабалася заўвага за кінуты ў цэнтры Мінска недакурак6
Каментары